دردشة مع الدكتورة سماح.. إسعافات أولية للأطفال 🚑

الاختناق Choking

  • تاريخ النشر: الخميس، 14 يناير 2021
دردشة مع الدكتورة سماح.. إسعافات أولية للأطفال ?
مقالات ذات صلة
دردشة مع الدكتورة سماح.. تصحيح مفاهيم وتوعية 🧡🧡
كيف أعرف أني حامل
التربية الإيجابية: تعرفي على القواعد والمحاذير لتنشئة سليمة للطفل

ماااما نووو نوووو حبيبي نوووو نوووو شيلها من تمك.. أوعى ماما.. كع حبيبي... لك لا تحطها بتمك يا قلبي 🙂 

هي المصطلحات الاعتيادية عند كل أم في ببيتها طفل تحت عمر السنة ورغم أنو الأم بتعرف أنو ما في أمل ولا فائدة من الحكي والأستاذ #حيحط_كلشي_بتمو 😅 بس ما فيها ما تحكي وتعيط 🙏

طيب افترضنا مثلاً المستكشف الصغير غافل أمو وانتصر بحرب أنو كلشي بالعالم يجربو بتمو أول 😡 وجرب يحط ٢٥ ليرة وبلعها الأفندي.. شو رح يصير؟

يلي رح يصير أنو البيبي ممكن يختنق والأم رح تركض عليه خايفة مرعوبة وتتربط أيديها ما تعود تعرف شو تعمل 😨

أنا هون لخبرك ماما شو نعمل 🧡

🔔 أول شي طالما البيبي عم يبكي بصوت عالي أو عم يسعل بشكل قوي.. تركيه، ممكن بسعلتو وبكيو يطلع القطعة.

🔔 إذا قدرتي تفتحيلو تمو وتشوفيها وتشيليها شيليها بس أوعك إن كان البيبي هايج أنو تشيليها.

🔔 البيبي عليه أي علامة من علامات الاختناق :

مزرّق، عم يتنفس بصعوبة، عم يطلع البكي ضعيف، السعلة ضعيفة، عم تطلع أصوات ناعمة منخفضة بين النفس والنفس.. هون بتعملي الآتي بالحرف :

✔ بتمسكي ابنك على كامل ذراعك ويكون راس ابنك لتحت، وجهو وبطنو للأرض.. أيدك ماسكة صدرو وأصابعك ماسكة فكو.. وبراحة الأيد التانية بتضغطي عضهرو بين #لوحي_الكتف دفع من تحت لفوق مو دق أوعى.. ضغطي ٥ مرات.. إن طلع الجسم طلع.. ما طلع!

✔ بتقلبيه ووجهو يصير لعندك وبإصبعين بتحطيهن نص الصدر تحت حلمتي الثدي مباشرةً وبتضغطي لتحت وانتبهي ما تعمقي كتير وكمان ٥ دفعات ليطلع الجسم..

٥ ضهر ٥ صدر وانتبهي تعملي #مناورة_هيملخ لرضيع ما بيتحمل حرام 😨

✔ إن شفتيه عم تسوء حالتو وما فيكِ عم تساعديه.. بهدوء اتصلي بالإسعاف وإن كان بحاجة إنعاش يفضل تكوني تعرفي كيف قبل ما تطبقيه 💔

أهم الشغلات يلي بيختنق فيها البيبي هيي الأكل، القطع المعدنية، البوالين، بطاريات الساعات.. وهوي بهالعمر الاكتشاف عندو قائم على أنو يحط كلشي بتمو يعني بطبيعتو عم يعمل هيك ما فيكِ تمنعيه 🤦‍♀️

بس انتبهي عليه قدر الإمكان وبعدي عنو كلشي ممكن يأذيه والأهم الأهم دوماً حاولي تكوني هادئة 🧡

نشالله ما بتوقع ولا أم بهيك موقف لأنو مرعب فعلاً وخاصةً بالنسبة لقلب الأم الحنون 💔

كنت معكم سَماح صالح محمد 🥀

تم نشر هذا المقال مسبقاً على بابونج. لمشاهدة المقال الأصلي، انقري هنا