من قلب العناية المركزة مها الصغير: أمي اتجوزت أبويا بعد فراق 22 سنة

نشرت  الإعلامية مها الصغير زوجة الفنان أحمد السقا وابنة خبير التجميل محمد الصغير، صورة لوالديها، عبر حسابها الرسمي بموقع "إنستقرام".
وظهر في الصورة محمد الصغير والسيدة ملكة العلايلي عند الزواج، والثانية لأيديهما متشابكة أثناء تواجده بالعناية المركزة لإصابته بفيروس كورونا.
وكتبت مها الصغير تعليقاً على هذه الصور: "في حاجة مهمة أوي عايزة كل العالم يعرفها، واكيد مش هعرف اكتب الكلام ده تاني".
وتابعت:"أبطال القصة دي هم أبي وحياتي كلها واللي يعرفني كويس يعرف إن محمد الصغير مش أبويا بس هو حب عمري".
وأضافت: "البطلة الثانية هي أعظم ست في العالم ملكة العلايلي، قصة حب عشتها على مدار كل يوم وكل ثانية لغاية اللحظة حتى لما اتطلقوا كنت عارفة انه بيحبها وهي بتحبه وعمري ما شفته أو شفتها سعيدة غير و هي مراته".
واستكملت مها الصغير حديثها عنهما: "المهم أمي اتجوزت أبويا وهي من عائلة ارستقراطية وهو من عائلة بسيطة وتحدت أهلها وقاطعوها وهو لم يكن معه سوى ١٠٠ جنيه، وحصل مشاكل واتطلقوا من ٢٢ سنة".
واستطردت: "يوم ما تعب وهو حواليه ناس كتير أوي (بس في الأفراح)، طلب مني أطلب أمي في التليفون وطلب يشوفها وجت له على طول".

وعن طلبه الزواج من والدتها مجدداً قالت:" يوم ما حس انه ضعيف اوي وتعبان بجد طلب ضهره وسنده اللي بجد مش في المنظرة وجت وطلب منها متزعلش منه وانها تتجوزه على سنة الله ورسوله تاني".
وعن شهود هذه الواقعة السعيدة قالت: "وأصدقاء الأبطال في هذا الفيلم الجميل اللي شهدوا هذه اللحظة هما أنا وأخويا مصطفى وأخويا التاني الدكتور اللي مسابنيش لحظة يحيي البستاني، الدنيا اتدربكت وطلب مأذون وجه المأذون جوز ملكة العلايلي لمحمد الصغير على سنة الله ورسوله".
واختتمت مها الصغير قائلة: "فهذه العظيمة اتجوزته وهو محلتوش حاجة وفي عز ضعفه ورجعت له وهو في عز ضعفه برده، ونام في حضنها وهو مرتاح أوي، هو الآن في أمس الحاجة للدعاء لأنه في لحظات حرجة أوي أوي أوي".