إنجي عبد الله توضح مدى خطورة مرضها: "انا متقبلة وراضية وعندي أمل كبير"
أثارت تدوينة الفنانة إنجي عبد الله على حسابها على فيس بوك حول مرضها والتأكد من وجود ورم في مكان خطير غير قابل للإستئصال الكثير من الأقاويل على المواقع الاكترونية ما جعل ملكة جمال مصر السابقة تعود وتنشر تدوينة توضيحية.
إنجي عبد الله قالت في تدوينتها: "انا بشكر كل الناس اللي سألت عني ، انا فعلا كنت محتاجة ده خصوصاً وانا مش في بلدي ، بس حبيت اوضح حاجة، ان الكلام اللي كتبته هو بالظبط اللي الدكاترة قالوه، بس في بعض المواقع كتبت اني في مرحلة يصعب فيها الشفاء، الكلام ده غلط ، كل الموضوع اني مينفعش اعمل عملية لانوا في مكان صعب ان يتعمل فيه عملية لانوا واصل للنخاع الشوكي، ومش عارفين خبيث او حميد ومش هيقدروا حتى ياخدوا عينه علشان نعرف، بس في علاج ممكن يوقف نموه او يقلله، ومفيش حاجه قليله علي ربنا ، وانا كتبت ادعولي، علشان محتاجه اعدي فتره العلاج بسلام مش اكتر ، وانا كويسه ومش في مستشفي ، انا في البيت وحياتى طبيعيه جدا الحمد لله ، وباكل كل اللى نفسي فيه من غير تأنيب ضمير ان ده هيتخنى او مش صحي (البنات بس اللى هتفهم الكلام ده) والحمد لله انا مش متضايقة بالعكس متقبلة وراضية".
شاهدي أيضاً: بعد 6 أشهر على زواجها: الفنانة إنجي عبد الله تصدم جمهورها بحقيقة مرضها وتطلب الدعاء
وتابعت إنجي عبد الله تدوينتها بالقول: "في كلمة في حق حد لازم اقولها هي بنت انا معرفهاش شخصيا اسمها (ليديا) كان عندها عشرين سنة وهي توفت تقريبا من شهر، وكان نازل عنها اخبار كتير على الفيسبوك، انا اتأثرت بيها اوي مش عارفة ليه ،وكنت وبقرا اي حاجة تنزل عنها ، وميريام جورج مرة نزلت لينك لقاء للبنت دي فى الراديو قبل ما تتوفى بسنة، كل الكلام ده قبل ما اعرف اي حاجة عندي ، المهم دخلت وسمعتها لمدة ساعة بتتكلم عن مرضها وهي بتضحك وسعيدة وراضية وحاسة طول الوقت ان ربنا معاها وقالت انا بحاول اوصل رسالة للناس ، انا بصراحة استغربت هي ازاي كده ، يا رب ازاي الواحد يكون عنده القوة دي، انوا يواجه حاجة صعبة كده ويكون راضي ومش بس راضي لا يكون سعيد وكأن مفيش حاجة ، الموضوع اخد مني وقت واتأثرت بيها وبكلامها، بس بعد كام يوم الموضوع عدى ونسيت، بس لما عرفت اللي عندي في الاول اتصدمت وبجد كنت خايفة اوي بس مش عارفة ليه افتكرت البنت دي وافتكرت كلامها، وانا في حالة نفسية صعبة، وفي عز خوفي قلت يارب اديني قوة البنت دي ، وكنت كل ما احس بخوف ادعي نفس الدعاء، والله العظيم بعدها انا حسيت ولا كأن في اي حاجه ، وكان لما اى دكتور جديد يأكد نفس الكلام كنت ببقي عاديه خالص، وانزل من عنده اخرج اتفسح اعمل شوبنج او اكل حاجه مكنتش باكلها علشان ممكن تتخني ، المهم انا وقتها ما فهمتش يعني هى ايه هي بتوصل رساله، بس انا دلوقتي فهمت ، واحب اقولك يا (ليديا) رسالتك وصلتني وشكرا بجد لانها مش بس فرقت معايا لا دي غيرت حاجات كتير اوى جوايا ، انا كويسة اكتر من اي وقت وعندي امل وحاسة انها فترة وهتعدي، ومش مهم خالص اي ظروف صعبه الواحد ممكن يعدي بيها المهم بجد انك تقرر تعيشها ازاي وهما اختيارين بس ، الاول كلنا عارفينه لانه سهل بس هيخلي حياتك وحياه اللي حواليك صعبه اوى ، والتاني انك تكون زي البنت دي(ليديا) اللي مبطلتش تضحك لاخر يوم، انا بجد كويسة ومتأكدة انها مرحلة وهتعدي".
ومن ليالينا نتمنى الشفاء التام للفنانة الشابة إنجي عبد الله.
شاهدي المزيد:
صور حفل زفاف ملكة جمال مصر السابقة إنجي عبد الله وألبر بوسوتر القائم بأعمال السفير التركي
هل تذكرون الفنان ابراهيم خان؟ شاهدوا صور نادرة له قبل وفاته وقد غير المرض ملامحه
صور تكشف اختلاف صادم في شكل نهى العمروسي بين بدايتها واليوم، فهل السبب المخدرات؟