هل تذكرون إيناس عزالدين نجمة أراب آيدول؟ هذه صورها اليوم تحتفل بعيد زواجها

مقالات ذات صلة

صورة إيناس عز الدين تحتفل بعيد زواجها الثاني

صور نجمة أراب آيدول إيناس عزالدين في تغير ملحوظ وخسارة وزن هائلة

هل تذكرون سلمى رشيد نجمة آراب أيدول؟ هكذا أصبحت اليوم شاهدوا جاذبيتها

احتفلت النجمة المصرية الشابة إيناس عز الدين مشتركة برنامج المواهب أراب آيدول بعيد زواجها الرابع الذي يصادف اليوم 19 أبريل وقد شاركت محبيها عبر حسابها الشخصي على موقع التواصل الاجتماعي فيسبوك بمجموعة من الصور لهما معاً والتي نالت إعجاب محبيها كثيراً وأرفقتها بتعليق طويل قالت فيه:

"اتعرفت عليه يوم ما دخلت الأوبرا وبقيت مطربة في دار الأوبرا المصرية كان يوم 14/9/2009

كان زميلي واتعرفت عليه زي ما اتعرفت على كل زمايلي بس كان فيه شيء مميز خلاه يبقى صديقي الأوحد ومن اول يوم بقينا اصدقاء كنا فعلا اصدقاء بس بقينا زي اتنين شباب اصحاب نخرج سوا ونتكلم ونفضفض لبعض سوا وفعلا ما كانش فيه بيننا اي حاجة بس كان كل اللي يشوفنا سوا يقولنا انتوا مكتوبين لبعض وكنا نسمع كلامه ونضحك فضلنا كام شهر اصدقاء فعلا بس

انا اللي حبيته الأول وانا اللي فجأة لقيتني بقرب منه لأني شوفت فيه حاجات كتير مش زي اي حد
شوفت فيه الراجل الجدع اللي عمره ما يتكلم على اصحابه
شوفت فيه الشهامة لأنه عمره ما اتكلم كلمة وحشة على خطيبته السابقة ولا حتى عمره حكالي تفاصيل حياتهم او سابوا بعض ليه او ذم فيها وكان دايما يقوللي النصيب وربنا يسعدها
وفجأة لقيته بيقوللي انا مش عارف استغنى عنك انا عايزك تكوني في حياتي بأي شكل وبأي طريقة انتي عايزاها المهم تفضلي في حياتي وانا قولتله باب بيتي مفتوح زي ما باب قلبي اتفتحلك

وفعلا جه واتقدملي ما فكرتش ولا اتناقشت لا في شبكة ولا في مهر ولا كل الكلام ده كان كل هدفي ان الراجل ده يكون هو اللي اكمل عمري معاه

اول ما قررنا نرتبط رسمي كل واحد فينا اتقاله على التاني بلاوي علشان الارتباط ما يكملش كان ردنا على كل اللي بيعملوا كده "دعوات خطوبتنا"

ويوم 23/9/2010 اتخطبنا وكان يوم ما يتنسيش من جماله

واجهنا صعوبات كتير وتحديات كتير ومشاكل نفسيه ومادية "وعلى فكرة احنا الاتنين متوسطين ماديا" الحمد لله بس دايما كانت بتعدي كان في شخصيته حاجات غيرها علشاني وانا كان فيا طباع غيرتها علشانه كنا عارفين ازاي نحافظ على بعض شقتنا احنا اللي وضبناها بإيدينا وعملنا النقاشة فيها وتعبنا وسهرنا بس كانت ايام ما تتعوضش

ويوم 9/3/2013 اتكتب كتابنا

ويوم 27/4/2013 كان فرحنا وبقيت مراته على سنة الله ورسوله

وقف جنبي كتير وساعدني اتقدم في شغلي بالعكس انا اتقدمت وحققت اهداف كتير وانا مراته ومعاه عمره ما شاف ان مكاني بس المطبخ والغسيل كان شايف اني لازم اتقدم في شغلي واحقق طموحي وكان دايما بيساعدني في كل حاجة حتى شغل البيت ايده بإيدي دايما

حملت في تؤام وشائت الظروف انهم يموتوا في بطني وانا في اخر الشهر الثالث عشت اصعب ايام حياتي واتعذبت عذاب لا يحتمل نزفت دمي كله وجسمي ضعف وكنت بموت لأني كنت دخلت في مرحلة تسمم هو اللي قعد بيا يشيلني ويأكلني ويغير هدومي وينضف مكاني ويشوف شغل البيت واتحمل مالا يحتمله بشر مش زي ناس كتير لما الست تتعب شوية يرميها عند اهلها ويريح دماغه ولما قومت بالسلامة من الالم الجسدي ساعدني اكتر على تخطي الألم النفسي اللي كنت فيه و وقف جنبي لحد ما قدمت في آراب ايدول واتحمل غيابي 6 شهور وفضل مساندني وبعد ما رجعت هو معايا في كل خطوة بمر كتير بأزمات نفسية بسبب شغلي وبسبب احتكاكي بالناس وبسبب ظروف الحياة بس طول الوقت بلاقيه جنبي وبيخرجني من أزماتي كأنه دكتوري النفسي

كنت بشوف لمعة عيونه وفرحتها لما الناس توقفني وتسلم عليا وتتصور معايا كنت بشوف دموعه المستخبية وانا واقفة بغني على المسرح والناس بتنادي بإسمي والأهم من كده اني عندي حمايا وحماتي زي العسل وناس مافيش اطيب من قلبهم واخواته البنات كمان هما اخواتي

عوضني عن حرماني من ابويا وانا عندي 5 سينين وبقى ابويا وصاحبي واخويا وابني ودايما بقوله يا "بابي" لاني بنوته وحبيبته وزوجته وكل حاجة ليه

بنضحك سوا ونلعب زي الاطفال سوا ونجري في الشارع ونتجنن سوا ونحزن ونبكي والدنيا تيجي علينا سوا ونسند بعض ونقوم نقف على رجلينا سوا وبنربي قطط وكلاب سوا والاهم من كده اننا بنغني كتير ونقرا قرآن ونستمتع بصوتنا سوا

وبعد 10 ايام هيبقى عيد جوازنا الثالث

صدقوني الدنيا لسه بخير ولسه فيه رجالة ولاد حلال بتتحمل المسئولية وبتشيل الست وتساعدها انها تنجح ويستاهلوا يتقال عليهم انهم سند في الدنيا وكفاية انه بيقف جنبي وبيساعدني في اي حاجة خير بعملها تجاه اي كائن حي

Ahmed Kamar

كل سنة وانت حبيبي يا احلى بابي في الدنيا وعقبال كل لحظة واحنا مع بعض".

شاهدوا الصور: