عبير صبري تثير الجدل بعد حديثها عن وفاة شقيق رامي صبري

أثار تعليق الفنانة المصرية، عبير صبري، جدلا واسعا، بعد تحدثها عن تفاصيل وفاة شقيق الفنان رامي صبري، غرقاً منذ يومين، ومطالبتها بسن قوانين تجرم النشر في قضايا المشاهير الشخصية.

عبير صبري تعلق على وفاة كريم صبري

ونشرت عبير صبري، عبر حسابها على إنستغرام، صورة للفنان رامي صبري وشقيقه الراحل كريم، ووجهت رسالة تعزية إلى رامي.

وكتبت عبير صبري: "ربنا يرحم الشاب كريم صبري ويعفو عنه ويغفر له ويدخله فسيح جناته شقيق الفنان رامي صبري" وتابعت مطالبة بسن قوانين لحماية المشاهير:  "الحقيقة أنا بناشد كل المؤثرين على السوشيال ميديا أنهم يطالبوا المجلس الأعلى للصحافة ومؤسسات الدولة المصرية ومجلس النواب أنها توضع قوانين لتنظيم النشر ووضع حدود للأخبار الشخصية اللي بتخص المشاهير في أي مجال فني أو غيره".

تابعت عبير صبري: "مش معقول ولا مقبول أن شاب يتوفى في حادث غرق وننشر شيء خاص بمرضه وما نحترمش سيرته ومشاعر عيلته أمه وأبوه وإخواته ونتاجر بأخبار الشاب المسكين والإدمان بالمناسبة مرض أكرر مرض زي السكر والضغط والأمراض المزمنة يعني مش قلة أدب ولا قلة تربية زي ما أغلب الناس فاهمة وعاوز علاج وله مستشفيات خاصة بفلوس كتير أوي مش معقول المواقع كلها تتسابق في نشر تفاصيل خاصة بمرضه وتجرح أهله".

أضافت: "وكأن مش كفاية مصيبتهم وحسرتهم على ابنهم الشاب اللي ضاع منهم فجأة وطبعا أذية الفنان رامي صبري والإساءة لسمعته لأنه مشهور والناس تموت في الفضايح والإشاعات والتحليلات سواء صح أو غلط أنا مش عارفة هتستفيدوا إيه ما فيش رحمة بالأهل؟ ما فيش أخلاق الستر؟ ما فيش أخلاق أنك ما تتدخلش في شيء لا يعنيك؟ ولا يعني جمهور السوشيال ميديا؟ مفيش قاعدة دينية بتنادي بعدم تتبع عورات الناس؟ ليه القسوة والرغبة في دبح الناس معنويا خصوصا لو كان مشهور مش كفاية اللي هما فيه أنتوا يعني مش عارفين أن كل البيوت فيها مشاكل وأمراض وبلاوي مقفول عليها بابها".

تساءلت عبير صبري: "إيه السبب أنكم تنشروا بهدف إحراج الناس وهتك أسرار البيوت؟ عشان فيها شخص مشهور زي الفنان رامي صبري فنبهدله ونطلع أسرار أخ له توفى وهو يعاني مرض من الله زيه زي ملايين الشباب.. عشان الترند والمشاهدة أقول لكم إيه بس أنا قلبي وجعني على الشاب المسكين ده ومعرفوش لكن بتمنى له الرحمة والمغفرة بعد موتته الصعبة ولأهله الصبر.. أمه وأبوه وأخوه ربنا يصبرهم".

اختتمت عبير صبري رسالتها: "وبناشد تاني كل المؤثرين على السوشيال ميديا ينضموا ليا ويطالبوا المجلس الأعلى للصحافة بتنظيم النشر وعدم هتك أسرار الناس واغتيالها معنويا بدون داعي طالما شيء شخصي لا يفيد مجرد كومنتات شتايم وتحليلات عن غير علم ولايكات وترندات هتتسألوا عليها يوم القيامة في مظالم حقوق العباد.. ربنا يرحمك يا كريم ويصبر أهلك".

انتقادات لعبير صبري بسبب تعليقها على وفاة شقيق رامي صبري

وانتقد البعض عبير صبري على تعليقها، حيث أثارت الجدل به، وانقسم الجمهور بين مؤيد ومعارض، وقال المنتقدون إنها أيضاً تحدثت عن تفاصيل كان من الممكن التغاضي عنها لتمر مرور الكرام.

وقال البعض: "حضرتك بتقولي زي الصحافة انة مدمن كان مكن تقولي مريض وخلاص"، "ما انتي فضحتي اكتر اهو و قولتي مدمن برده"؟ "ربنا يرحمه ويغفرله .. للعلم انا ماكنتش اعلم انه كان مدمن وعرفت منك".

كما اتهم البعض عبير صبري بالمزايدة وكتبوا: "ياعم اللي حصل حصل خلاص...تعددت الاسباب والموت واحد..ماحدش مجروح في العالم قد أمه وأبوه واخواته..ايا كان سبب الوفاة...ده عمره فبلاش مزايدات وعلى فكرة الكلام الكتير عن الموضوع ده هو اللي يخلي الموضوع يتعرف اكتر واكتر والناس تتكلم فيه...خلاص المرحوم في دار الحق وماتجوزش عليه غير الرحمة وبس...ربنا يرحمه ويرحم الجميع".

بينما قال البعض إن الفنانين يريدون أن تتحدث الصحافة والأخبار عنهم بما يريدون فقط، دون دفع أي ضريبة للشهرة، برغم أنه أمر منطقي وشقيق المتوفى نفسه لم يعترض.

وعن اختصاص عبير صبري الصحافة والمواقع الإلكترونية، فقط لتوجيه اتهاماتها، علق البعض أنها تخشى خسارة المنابر الإعلامية الأخرى، وقال أحد التعليقات: "انتو مصدقين نفسكم يعني هي السوشيل ميديا وبسسسسس و لا البرامج مهو لميس الحديدي قبل شويه قالت الخبر وان كذا و كذا بالتفصيل وهروب و ادمان متقولي الاعلام و البرامج ليه خايفه"؟

على صعيد آخر اتفق البعض مع رسالة عبير صبري وقالوا: "عندك حق أتفق معاكي"، "معاكي حق ومحدش اصلا سأل ولا كان مهتم بالسبب قد مزعلنا عليه وفالاخر تعددت الاسباب والموت واحد اجله انتهي في هذه الساعه وفالاخر الف رحمه ونور عليه ربنا ييمن كتابه ويثبته عند السؤال ويتجاوز عن اخطائة ويصبر قلب والدتة وحبايبه البقاء والدوام لله".

يذكر أن المطرب الشاب كريم صبري، شقيق رامي صبري، كان قد لقي مصرعه غرقاً، في ترعة المريوطية، أمس الأول، وشيعت جنازته أمس من مسجد الشرطة بالشيخ زايد، ودفن في مقابر الأسرة بـ 6 أكتوبر طريق الواحات، ونعاه شقيقه وعدد من نجوم الفن اللذين قدموا واجب العزاء في الفقيد.