قصة المشهد الأخير بين فاتن حمامة و عمر الشريف

  • تاريخ النشر: الإثنين، 19 يناير 2015 آخر تحديث: الإثنين، 07 فبراير 2022
قصة المشهد الأخير بين فاتن حمامة و عمر الشريف

كشف السيناريست محمد دياب عن قصة آخر مشهد جمع بين سيدة الشاشة العربية فاتن حمامة والفنان العالمي عمر الشريف، هذا المشهد ليس ضمن أحداث فيلم سينمائي أو مسلسل تليفزيوني، لكنه كان عبر مكالمة هاتفية، كانت هي الأولى بعد انقطاع دام 20 عاماً.

حيث كتب السيناريست محمد دياب تدوينة طويلة على حسابه الشخصي على موقع التواصل الاجتماعي قال فيها:

آخر فيلم قصير لعمر الشريف أخرجه صديق ليا في لندن من كام شهر. حكالي أن أكتر حاجه كانت ممتعة في المشروع أنه شاف عمر الشريف عن قرب، حاجات كتير حكالي عنها وكانت كلها بالنسبالي مبهرة - طبعاً أنا واحد من مجاذيبه- بس أكتر حاجة كنت فاكرها إشاعة أو مبالغة هو كلامه عن فاتن حمامة.

صديقي بيقولي إن بين كل جملة وجملة عمر الشريف لازم يجيب سيرة فاتن حمامة و أنه لسة ندمان على أنهم سابوا بعض. راجل في الثمانينات و بالمعني الحرفي للجملة عرف أجمل ستات العالم وعمره ما قدر ينسي حبه الوحيد! بصراحة كنت فاكر دي قصة مراهقين والمبالغة غالبة عليها مع إني سمعت الموضوع ميت مرة، بس أتفاجأت بإن الواقع ساعات بيبقي كليشيه وميلو درامي أكتر مالخيال.

لأسباب ميعرفهاش صديقي ومسألش عنها عمر الشريف طلع مكلمش فاتن حمامة من عشرين سنه!

شاهدي أيضاً: هذا ما قاله عمر الشريف بعد وفاة فاتن حمامة

بعد يوم من أيام التصوير عمر الشريف خد صديقي يعرفه على دكتور صديق قديم لعمر الشريف في لندن، على العشا كالعادة جت سيرة فاتن حمامة، الدكتور اللي طلع صديق مشترك بين فاتن حمامة وعمر الشريف قاله يا عمر أنا معايا نمرة فاتن إيه رأيك تكلمها!؟

عمر الشريف تنح لثواني وفجأه كل الأسباب اللي منعته عشرين سنة أسقطها من حساباته، الدكتور طلبلهاله … عمر الشريف خد التليفون و كلمها.

أزيك يا فاتن؟

عمر الشريف قالها كده و خد التليفون بعيد. صديقي مسمعش باقي المكالمة، بس بيوصف إن عمر الشريف كان متأثر قوي و هو بيكلمها شاف في عينه وحركة جسمه توليفه من كل المشاعر الإنسانيه … صديقي كان فخور بعد ما خلص الفيلم أنه أشتغل مع عمر الشريف، بس كان فخور أكتر بكتير إنه شهد لحظة تاريخية زي دي.

الحمد لله أنهم كلموا بعض قبل ما كانت الفرصة تروح.

الله يرحم فاتن حمامة ويصبر كل اللي حبوها … و بالذات أكتر واحد حبها.

شاهدي المزيد:

61 صورة لفاتن حمامة بعيداً عن الكاميرا

12 معلومة لا تعرفونها عن سيدة القصر فاتن حمامة

تعرفوا على اللحظات الأخيرة قبل وفاة سيدة الشاشة فاتن حمامة