محمد دياب يكشف مفاجآت عن مسلسل أشغال شقة جداً

كشف محمد دياب عن رحلة معاناة، عاشها مع أشقائه بسبب مسلسل أشغال شقة جدا، وأوضح المؤلف الشهير عن رفض كثير من النجوم للعمل الدرامي، معلنين عن اشتراطاتهم الغريب للموافقة على المسلسل.

مسلسل أشغال شقة: 5 أعوام من الرفض

وكتب محمد دياب، مؤلف مسلسل أشغال شقة، عبر حسابه الشخصي على تطبيق التواصل الاجتماعي، فيسبوك: "الحمد لله أشغال شقه للسنة الثانية ينجح نجاح ساحق، بس ورا النجاح ده قصه". وتفاعل معه الجمهور في تعليقات عبروا من خلالها عن إعجابهم بالمسلسل الكوميدي.

وكشف عن السر وراء نجاح أشغال شقة جداً قائلاً: "أشغال شقه ده لمدة خمس سنين يتعرض على منتجي مصر كلهم، ولكن مكانش فيه حماس ليه، تقريبا معظم ممثلي مصر رفضوه رجاله وستات. ولما مرة نجم كبير تحمس له، ومضاه فضل يطلب تغييرات لدرجة أنه في الآخر طلب ان شغل البطل يتغير وتتشكل فكرة الشغالات".

وأضاف مؤلف مسلسل أشغال شقة جداً: "في ناس لم تكن معجبة بالفكرة وناس كانت شايفة إننا بنكتب جد فمش هنعرف نعمل كوميدي، وناس عايزة الفكرة  بس اللي يخرجها حد تاني غير خالد... رد الفعل ده كان هيجنن خالد وشيرين، إحساس صعب لما تبقي مؤمن بحاجة و اللي حواليك مش شايفنها".

وعن تأثير عدم إيمان البعض بفكرة المسلسل كتب محمد دياب: "ساعات ده بيشككك في نفسك. أربع سنين تعدي ومينزلش لخالد وشيرين أي مشروع، الضغط خلي خالد يقبل ان أشغال شقه يتعمل، و لو بمخرج تاني. خالد لأي حد يعرفه هو أكثر إنسان كوميدي تقدر تعرفه وانا وشيرين كان عندنا قناعة أنه من أشغال شقه هيطلع كوميديته الخاصة اللي هتكسر الدنيا".

مسلسل أشغال شقة جداً

كشف محمد دياب عن رحلته وأشقائه للعودة للترويج للمسلسل، وكتب في منشوره: "بصعوبة شديدة رجع خالد وشيرين يحاولون ورا المسلسل، لغاية لما جه هشام ماجد اللي آمن بيه وبخالد كمخرج، وجت شركة الإنتاج (اي برودسيرز) اللي هيأت له اسباب النجاح".

وتابع محمد دياب: "أشغال شقه نجح واستخدم توليفه كتابية مختلفة مش قايمه عالإيفيهات، وخالد كمخرج طلع عنده صوت وشخصية ورؤية بصرية باينه في كل مشهد. انا طول عمري بتفرج علي كوميديا المسلسلات، وابتسم كام مرة وابقي مرضي، بس ان الواحد يضحك بصوت ولغاية لما بطنه توجعه وده يحصل كل حلقة، فمتخيلتهاش تحصل في مسلسل".

واختتم محمد دياب منشوره قائلاً: "بالنسبة لي المخرج والمؤلف الشاطرين هما اللي بيعملوا حاجة أحس اني معرفش اعملها وأنا لما بتفرج علي أشغال شقه ببقي متأكد إني معرفش اعمل منه مشهد... فعلاً كل تأخيره وفيها خيره".

 مسلسل أشغال شقة جداً، واحد من مسلسلات رمضان 2025 الكوميدية، وبعد نجاح الجزء الأول، نجح صناع العمل في إنتاج جزء جديد، اعتبره البعض يتضمن جرعة كوميديا مكثفة مقارنة بالموسم الأول.

يشارك في بطولة المسلسل هشام ماجد، أسماء جلال، شيرين، مصطفى غريب، ونخبة من نجوم الدراما، إلى جانب الكثير من نجوم العرب الذين يظهرون كضيوف شرف في المسلسل، الذي يعتمد على أزمة عائلة دكتور حمدي مع الشغالات، والتي تتفاقم مع زيادة أفراد الأسرة بعد إنجابهما توأم جديد.