رأي منة فضالي في أزمة البكيني والبوركيني ومتابع: مبررات لا تقنع

دخلت الفنانة المصرية منة فضالي، على خط أزمة البكيني والبوركيني التي أثيرت على الساحة مؤخراً، بعد نشر فيديو لابنة طبيبة مصرية شهيرة تحكي باكية عن منعها نزول حمام السباحة بسبب ارتدائها البوركيني، او كما يطلق عليه المايوه الشرعي للمحجبات، والذي انقسمت حوله الآراء.

رأي منة فضالي في ارتداء البوركيني

وعبرت منة فضالي عن دعمها لموقف المحجبات اللواتي يردن نزول البحر أو البيسين بالبوركين، مؤكدة أن هذه حرية شخصية لا دخل لأي شخص فيها.

وكتبت منة فضالي عبر حسابها على فيسبوك: "مش فاهمة إيه العيب أن واحدة محجبة تنزل بمايوه شرعي ايه اللي يزعل في كده وعلشان إيه ممنوع؟..هو لازم يعني العالم كله يلبس بيكيني إن شاء الله إيه الهبل ده؟".

وتابعت منة فضالي:"ربنا يدينا الهداية ويتوب علينا كلنا والله... ليه القرارات النيلة دي عالم متخلفة وتافهة.. هتتقولوا لي ما إنتي بتلبسي مايوه وبتتصوري والهري ده هقول أنا حرة زي أي حد حر، ما دام في حالي زي ما كلكم زمان أهاليكم كانوا بيلبسو كده وأكثر... بس للأسف احنا عندنا دلوقتي عدم احترام".

واختتمت تعليقها:"مش معني كده اني صح واني بشجع علي المايوه بس ها يجي يوم ومش هعرف البس حاجة من اللي قادرة البسها دلوقتي كل سن ولي احترامه ولبسه.. احترموا حريه الناس وافتكروا أن ربنا اللي بيحاسب مش البشر.. وأنا مع الست اللي تلبس مايوه شرعي وضد التخلف بتاع الممنوع".

الجمهور يعلق على منشور منة فضالي

تلقت منة فضالي العديد من التعليقات حول رأيها في ارتداء البوركيني، ووصف البعض الأزمة بأنها مفتعلة، وآخرون أيدوا رأي منة.

وقال بعض الداعمين: "أنتي صح جدا وانا زيك وزي اي بني آدم..مقصر وبعمل زنوب..بس الواحد بردو مش من حقو يمنع الناس الملتزمه انها تعيش حياتها ولا تجبرها انها تقلع او تشرب عشان تليق عالمجتمع الجديد اللي فجاءه بقيني فيه..تحياتي يا منه على شهادة الحق"، "كل واحد حسابو عند ربنا وكل واحد حر مدام مش بياذي حد بس للاسف هنا مافيش اي احترام لحرية الانسان وزي ما انتي قلتلي كل سن وله لبسه"، "انتي حد محترم جدا وصريح قدام نفسه قبل ما تكوني صريحه قدام الناس اتكلمتي بحياديه جدا وادتي لكل حد حقه.. ياريت فعلا كل واحد يلتزم بحريته بدون تعدي ع الغير ياريت نحترم بعض شويه قمة التخلف والتعنت الغير مبرر انه يمنعها احنا بلد مسلمين ومتحضرين ياريت نطبق الحريه بدون تحيز لحد".

كما تلقت منة فضالي تعليقا استفزها حيث كتب أحد متابعيها: "مع احترامي الكامل لكلامك بس سؤال واتمنى تردى عليه هو انتى لو توفاكى الله فى السن ده او اللحظه اللى بتتكلمى فيها دلوقتى . لما يجى ربنا يحاسبك بقى هتقولى لربنا اصل كل سن و ليه اللبس بتاعه فعادى البس مايوة علشان انا سنى مش كبير اوووي طبعا كل واحد حر فى حياته بس بلاش مبررات لا تقنع أتمنى تكون الرساله وصلت".

لترد عليه فضالي قائلة: "اما تبقي ربنا نبقي نتكلم ان شاء الله ده علي اساس انك مش راجل وبتمشي تعاكس في البنات و بتسهر  ولما انت تموت بقى وانت بتعمل الحرام حتقول لربنا مش دلوقتي والنبي، ربنا يتوب علينا كلنا".

منة فضالي بالمايوه

ومنة فضالي احدة من بين النجمات اللاتي أثرن الجدل خلال الفترة الماضية بإطلالة وصفها بعض متابعيهم بـ"الجريئة" حيث نشرت عبر حسابها الشخصي على تطبيق انستقرام صورة لها وهي ترتدي مايوه أسود وتقف داخل حوض سباحة.

بمجرد نشر الصورة، انهالت على منة فضالي بعض التعليقات الناقدة لها،  إلا أن منة فضالي لم تقف صامتة أمام ما تعرضت له في التعليقات والرسائل الخاصة، وهاجمت منتقديها، والمتجاوزين في حقها عبر حسابها الشخصي على تطبيق التواصل الاجتماعي من خلال فيديو نشرته عبر صفحتها الشخصية، وجهت لهم فيه رسالة حادة وهددت بفضحهم.

وفي مقطع الفيديو الذي كشفت فيه عن الرسائل التي تلقتها، قالت منة فضالي: "أنا بقالي كتير ما طلعتش لايف، وما بحبش أعمل ده إلا في الضرورة، أنتوا عارفين إننا كفنانين بنتعرض لكلام مش لطيف سواء في التعليقات أو المسجات، بيفتكروا إننا مش بنشوف المسجات والكومنتات، لكن أنا بشوف ده لأني بتفاعل مع متابعيني وبرد عليهم وبكلمهم".