شريف إدريس يبكي القلوب ببيان اعتزاله: أحلم أني أقتل أولادي من الفقر

أبكى الفنان المصري الشاب شريف إدريس القلوب بإعلان خبر اعتزاله، ونشر نجم مسلسل أرابيسك، بيان اعتزال تضمن الكثير من الكلمات التي أحزنت محبيه.

 وكشف النجم الشاب في بيانه عن غضبه الشديد من بعض المواقف التي يتعرض لها لقبول أدوار جديد، متحدثاً عن الأزمة المالية التي يعيشها والتي تتسبب له في حالة نفسية شديدة السوء تجعله ملازماً للكوابيس.

اعتزال شريف إدريس

وكتب نجم مسلسل ارابيسك شريف إدريس منشور، عبر حسابه الشخصي على تطبيق فيسبوك، جاء فيه: "بعد ٣٥ سنه سعي وتعب وشقي في الوسط الفني قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد..وده قرار أخدته بعد ما الامور وصلت في الوسط الفني لمرحله عبثيه وصلت اني بقيت بشوف بعض الزملاء بيشحتو الشغل علني علشان يشتغلو لان الشغل بقي متقسم علي ناس معينه..فلو الامور وصلت لكده ابعد احسن..وحتي لما بيجي شغل بيتفرض عليك توافق باقل الفلوس وتخرج من الشغل مديون..ومواقف مهينه زي إن شركة انتاج تعرض عليك اجر هو قيمة ربع أجرك والسبب انهم الميزانيه مصروفه عالديكور..طب خلو الديكور يمثل".

وأضاف نجم مسلسل أرابيسك في منشوره: "هحكيلكم موقف حصل معايا من اسبوع..اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور..كان هيجيلي جلطه بعد ماقفلت المكالمه ووافقت علشان انا محتاج اشتغل ومحتاج فلوس..وماقدرتش استوعب الفكره بصراحه اني بعد العمر ده مضطر ادفع علشان اشتغل فاتصلت واعتذرت…وده الحال حاليا ان الامور بقت في ايد كاستينج دايريكتور..وده موقف من مواقف كتير مريت بيها لو حكيتها محتاجه كتاب مش بوست عالفيس".

وتابع شريف إدريس: "فطالما الشغل بقي لازم يتدفعله..وطالما الشغل بقي بالشحاته..يبقي بلاش احسن، أنا طول عمري راضي الحمد لله..بس حقيقي انا وصلت لمرحلة اكتئاب وصلتني اني بقيت بنام احلم بكابوس اني بقتل عيالي وبقتل نفسي لأني وصلت لمرحله نفسيه وماديه اني بقيت مش قادر اربيهم ولا اصرف عليهم وانا عندي تلات اطفال بعبدهم عباده متخيلين حجم المسؤليه..وبقيت مديون لطوب الارض".

شريف إدريس يطلب المساندة من جمهوره

وفي نهاية منشوره طلب شريف إدريس من جمهوره الدعم، وكتب: "حقيقي لو حد عنده فرصة سفر ليا هاكون شاكر ليه جداً وهيكون جميل في رقبتي لحد ما اموت لأن حقيقي انا مش قادر اعيش في البلد دي تاني انا حاولت اسعي في اي مجال تاني بس ماقدرتش".

وأكد شريف إدريس أنه لن يقبل بأي دور بطولة يعرض عليه بعد ما كتبه قائلاً: "حقيقي لو اتعرض عليا بطولات بعد البوست ده هرفضها لان البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شئ.. همسح ابلكيشن فيسبوك من تليفوني لاني هنزل ابيع تليفوني اصلا..فأنا هاكون متاح اونلاين لحد بالليل..لو حد عنده فرصة شغل وسفر ليا ومش معاه رقمي ياريت يجيبه من اي حد".

واختتم شريف إدريس منشوره وكتب: "ملحوظه: أنا مش محتاج طبطبه من حد أنا محتاج فرصة سفر وشغل تخليني اعيش ولادي حياه كريمه وبس.. شكرا ليكم محبتي للجميع.. هاين عليا أقوم أرمي نفسي من البلكونه بعد ماوصلت إني أكتب البوست ده".

جمهور شريف إدريس يرد

منشور شريف إدريس أحدث حالة من الغضب بين الجمهور حزناً على نجمهم الموهوب وبمجرد نشؤ كلماته تفاعل المتابعين في تعليقات منها: "ربنا عوضه احسن واكبر والله ربنا يعوضك كل خير ويفرح قلبك انت ممثل شاااااطر اوووي وموهوب انت في ضغط نفسي ربنا يعينك عليه وان شاء الله هتكون نجم النجوم"، "انا بحبك جدا. واعمل اللي انت عايزه بس اوعي تضايق نفسك وتكتائب عشان خاطر عيالك ونفسك وربنا معاك ف اي قرار تاخده ويوفقك يااستاذ ياجميل".

 وحاول البعض تقدين بعض النصائح للنجم الموهوب في تعليقات منها: "مش حقولك معلش واستحمل والكلام ده علشان عارفة انه لا بيودي ولا بيجيب بس عاوزة اقولك ان كل الشغل شغال كده دلوقت ادفع علشان تعدي مش فالفن بس حتي السفر اللي بتفكر فيه كله قرف وعك واول خطوة فيه ادفع علشان تسافر وبعدها ادفع علشان تشتغل وادفع علشان محدش يعمل فيك خوازيق فالشغل ده غير المعامله زي الزفت من اللي مشغلينك وحتستحمل وترضي غصبن عنك لانك مقدمكش حل تاني وانت فبلد غريبة عايش حياه كئيبة وبرضو حتلاقي نفسك يدوب قادر تعيش … انت عارف اني مش بقول كلام وخلاص انا بتكلم عن تجربة .. الحياة صعبه في كل حته مش هنا بس .. تعالي علي نفسك هنا واستحمل وانت بين عيالك واهلك واصحابك بدل ما تيجي علي نفسك وانت بعيد ولوحدك وربنا يصلحلك الحال يا رب".