اتهامات لمسلسل خالد نور وولده نور خالد بالسرقة

يواجه مسلسل خالد نور وولده نور خالد اتهامات بالسرقة بعد أن كشف شاب يدعى حاتم حسين عن أنه صاحب فكرة المسلسل وبدأ بالفعل في العمل عليها وطرحها على نجم شهير وشركة الإنتاج ليفاجأ بعدها بتنفيذها دون علمه.

نشر حاتم حسين منشور عبر حسابه الشخصي على تطبيق التواصل الاجتماعي فيسبوك، كشف فيه عن التفاصيل، ليتفاعل بعدها معها الجمهور بعدد من التعليقات  التي عبرت عن صدمتهم.

ومسلسل خالد نور وولده نور خالد بطولة كل من كريم محمود عبد العزيز، شيكو، آية سماحة، صلاح عبدالله، ونخبة من نجوم الفن والدراما.

مسلسل خالد نور وولده نور خالد

وفي التفاصيل كتب حاتم حسين: "طيب يا جماعة مسلسل خالد نور وولده نور خالد فكرته الأساسية إن أب وابنه في نفس السن يخوضون رحلة، دي فكرة مسروقة من مسلسل أنا كنت عامله وبعدها أتحول لفيلم.. والحقيقة إن المسلسل كفكرة طلع لأحمد أمين وأكرم حسني وبعت لأمين المعالجة في عرض مرئي..  أحمد أمين بكل احترام أخبرني رأيه وتخوفاته من الفكرة.. وهو  ممكن أمين يشهد على ده ..  بعدها للأستاذ طارق الجنايني عجبته الفكرة وشاف إننا ممكن نحولها  لفيلم وأنا بالفعل  اشتغلت على معالجة الفكرة وتحويلها لفيلم بعدها طارق الجنايني انشغل والموضوع نام..  فيه إيميلات بالمعالجة مبعوتة".

وأضاف حاتم حسين موضحاً التفاصيل: "المهم الفكرة فضلت موجودة لحد ما بدأت اشتغلها مع نجم كبير، طبعا مش حقول اسمه،  وفي وسط الشغل فوجئت بالملصق الدعائي المسلسل.. من الاسم أنا شكيت، فكلمت شريكي في الكتابة أحمد رشدي عرفت أنه عرض الفكرة على نجم كوميدي، وبرضه مش حقول اسمه، فعجبته جدا وتحمس لها وشاف إن أنسب واحد يعملها معاه هو كريم محمود عبد العزيز وفعلا قابل الفنان اللي انبهر بالفكرة لكن ما اظهرش اي اهتمام  زي ما قال النجم اللي انا أثق في كلامه".

وتابع: "كل ده كنت مش متأكد أنها نفس الفكرة، بعدين قررت أكلم  مؤلف المسلسل صديقي قلت له عايز أسألك سؤالاً هل المسلسل بتاعك قصته ان يكون أب وابنه في نفس السن بيعملوا رحلة ما (buddy comedy) odd couple فرد بالإيجاب، ولما سألته أنت اللي جايب الفكرة ولا نجم أو منتج قالولك احنا معانا فكرة logline عايزين نشتغل عليه، قال لي  أنا اللي جايبها أنا وحد بيكتب معايا فصدقته.. بس بعد كده هو أخبر النجم ده ان شيكو هو اللي جاب الفكرة وجده طبعا عكس كلامه معايا..  وأنا عاذره لأنه ممكن يبقى مش عايز يلبس حد". 

واستكمل حاتم حسين التفاصيل قائلاً: "هي دي الحكاية ...هتسألوني مسجل هاقولكو آه مسجل..  الفكرة بس ان اللي بيحصل إنك  بتتحايل على  الفكرة وتخلق مبررات تانية وشخصيات تانية بس بتبقى حرقت أكتر عنصر جذاب في الحكاية وهي إن أب وابنه في رحلة بين الماضي والحاضر.. وفي الآخر هتبقى مش نفس الفكرة  ويتقال إن ده توارد أفكار.. أنا عامل البوست ده ليه.. عشان لازم يبقى فيه طريقة تحفظ الحقوق والأفكار منمن السرقة اللي بنتعرض ليها من المنتجين والممثلين.. إحنا يا جماعة كمؤلفين بنبيع فكرة، ولو اتوافق عليها بنقول تمام وبنبدأ نكتب أكيد مش كل ما هتجيلي فكرة هروح أكتبها فيلم أو مسلسل قبل ما أعرضها على أي حد.. واللي عايز يسرق بيسرق سطر مش بيسرق فكرة كاملة بالطريقة دي".

واختتم حاتم حسين منشوره بكلمات: "أكيد أنا متضايق شوية لأن الفكرة دي كنت بحبها جدا وكنت مجهز لها حاجات حلوة وكنت هاعملها مع كوميديان كبير أنا بحبه وبقالنا كتير عايزين نشتغل مع بعض .. والحقيقة أنا متضايق جدا خصوصا إنها مش أول مرة تحصل معايا وأنا مستعد للمواجهة مع كل صناع العمل.. الفكرة عندي من أغسطس 2021".