خالد سرحان يرد على سخريته من فيديوهات محمد رمضان

كشف خالد سرحان عن رأيه ومواقفه في الكثير من الأزمات والقضايا التي تتعلق بالوسط الفني، والتي كان من أبرزها رأيه في اعتزال حلا شيحة بعد الحجاب، وتقليده لفيديوهات محمد رمضان.

كما تطرق خالد سرحان، خلال لقائه مع برنامج حبر سري، للحديث عن رفضه للمشاهد الجريئة، وتفاصيل الحالة الصحية للزعيم عادل إمام.

خالد سرحان وحجاب حلا شيحة

وفي تصريحاته عن اعتزال حلا شيحة بعد الحجاب قال خالد سرحان: "حلا زي أختي بالضبط، وهي رجعت الفن، وأنا كنت متأكد إنها هترجع وفكرة إنك تقعد تروج إن الفن حرام مرفوضة والفن ضمير الأمة.. أنت ممكن تكون معترضاً على حاجة ده حقك وأعمال معينة ده حقك إنما الفن ده احنا ورثناه عن أجدادنا، ومصر ثاني دولة في العالم دخل فيها الفن".

وأضاف خالد سرحان: "كنا أول ناس عملنا الشريط السينمائي، وورثنا الفن من زمان ودي حاجة تعمل دخلاً قومياً للبلد ومفيدة إنسانيا والفن شيء روحاني رائع، واللي مش عاجبه حاجة ميشوفهاش، لكن حلا حقيقي أنا بعتبرها أختي وأنا متأكد إنها ندمت على تصريحات الفن حرام؛ لأنها رجعت تاني".

تفاصيل الحالة الصحية لعادل إمام

وكشف خالد سرحان خلال لقائه تفاصيل الحالة الصحية لعادل إمام قائلاً: "عادل إمام زي الفل وشخصية لن، ولم  تتكرر وفي ناس تتمنى تشتغل مع عادل إمام مشهد، وأنا عملت معاه مسلسلين و3 أفلام".

وعن مشواره الكوميدي قال خالد سرحان إن عادل إمام له التأثير الأكبر في مشواره ككوميديان، وأن العمل معه ساعده في تقديم الكثير من الأعمال الأخرى فيما بعد قائلاً: "كان شرف ليا العمل مع عادل إمام وهو ساعدني، وفي أعمال عملتها معاها أعطتني فرص كويسة لتقديم أعمال جديدة فيما بعد.. وأنا من كل قلبي أتمنى للزعيم الصحة وطولة العمر وهو طلع أجيال ورا أجيال في السينما المصرية ودائما ثابت في مكانه، ولازم يدخل موسوعة جينيس".

وعن أول أعمال، في مسلسل العائلة والناس، قال خالد سرحان إن دوره في مسلسل العائلة والناس يعد من أبرز الأعمال والأدوار التي قدمها في حياته، رغم أنه قدم فيه شخصية الشرير.

وعن علاقاته في الوسط الفني، قال خالد سرحان: "علاقاتي في الوسط الفني ضعيفة جدا وأصدقائي فيه مش كتير خالص.. أنا 99% من أصدقائي خارج الوسط الفني، وأنا صنايعي شاطر واتربيت على إيد أسطوات في الفن".

خالد سرحان: أرفض تقديم مشاهد جريئة

وعن قرار الزواج قال خالد سرحان: "الجواز صعب عشان بتختار البني آدم اللي هيعيش معاك، وبحب حياتي يكون لها خصوصية وبعيدة عن أي حاجة، ولما يكون فيه حد معاك في البيت لازم تدرس يكون مين".

 أما عن تقديم المشاهد الجريئة، فقال خالد سرحان: "هذه المشاهد مش شبهي، وفي النهاية كل حاجة مشيئة الله وأنا كويس بالنسبة لناس كتير أحسن مني ومخدتش فرصة، واشتغلت مع أساتذة كبار ومحتاج أعمل أكتر من كده واطلع اللي جوايا، إنما في الوقت مش بتاعي وكله بأمر ربنا.. أنا راضي بقسمة ربنا خاصة وأن السوق مش سهل، وفي قلة أعمال".

ووصف خالد سرحان التمثيل بمهنة ظالمة قائلاً: "أي شاب عندنا لما بيتخرج من الجامعة ويروح يخطب.. الأب يسأله إنت بتشتغل إيه، فتقوله ممثل، يقولك يعني عندك شغل ثابت، عندك مرتب ثابت.. تأكل بنتي تمثيل ولا هتمثلها في البيت.. النموذج ده بالتأكيد عنده حق، لإن الشخص بيكون عاوز بنته تتجوز رجل يعمل عمل مضمون ودخله مستمر".

رد خالد سرحان على تقليد فيديوهات محمد رمضان

وعن تقليده لفيديوهات محمد رمضان والسخرية منها، قال خالد سرحان: "أنا لما بعمل الفيديوهات مش بجيب سيرة حد وأنا بعمل فيديوهات براحتي وأنا واحد من الناس، ومش بجيب سيرة حد، وأنا مع الناس ومليش دعوة بأشخاص ومجبتش سيرة حد في أي حاجة من فيديوهاتى".