بهاء الدين محمد يكشف أسباب اعتزاله ويعلن قرار جديد

بعد موجة حب تلقاها الشاعر الشهير بهاء الدين محمد عقب إعلان قرار اعتزاله، أعلن الشاعر المصري تراجعه عن قراره موجها رسالة شكر لجمهوره ونجوم الفن. كما كشف عن السبب الرئيسي الذي دفعه لاتخاذ القرار.

وكان بهاء الدين محمد أعلن قرار اعتزاله، عبر منشور كتبه في حسابه الشخصي على تطبيق التواصل الاجتماعي فيسبوك تسبب في موجة حزن واسعة بين محبيه من نجوم الغناء في الوطن العربي.

اعتزال بهاء الدين محمد

وترجع بهاء الدين محمد عن قراره بكلمات: "مهما توقعت أو حسيت أو تخيلت مش حعرف أوصف إحساسي بكلام يرد بكل احترام على رد فعلكم وفعل زمايلي الفنانين اللي رافضين قرار اعتزالي والتركيز فقط على تأملات في نِعم الله" .

وأضاف: "ورد الفعل اللي رافض القرار خلاني أسكت وأفهم وأعرف وأشوف بصورة واضحة مدى الحب والتقدير اللي وصلني من كل مكان وعرفت من خلاله إن ليا مكان فقلوب من حقهم الرفض .. ورد الفعل اللى رافض الاعتزال خلانى أتجاوز اللحظة اللي خليتني أفكر فالقرار" .

سبب اعتزال بهاء الدين محمد

وعن سبب قرار اعتزاله قال الشاعر بها الدين محمد: "كانت لحظة سخيفة إتجمعت فيها أحداث كتيره مش حلوة ونفوس وقلوب كلها حقد وسواد وغباء في الحياة الفنية والشخصية وكم كبير من ضعف وطمع ناس مش ناس".

وتابع: "وأنا مهما قابلت وكنت قد أي هجوم قذر أو بالمعنى الأوضح وساخة ناس مريضة وكلها غل ونقص بس حسيت إني محتاج هدوء . وحسيت فلحظه إني محتاج أعيش لنفسي ومع نفسي بعيد عن أي ظروف تجبرني على الاحتكاك أو معاملة الناس المرفوضة دين وحياة وأخلاق.. وأنا مش سهل أوصف ناس بالشكل ده".

واستكمل حديثه موضحا سبب اعتزاله: "كانت لحظة تقيله على القلب ولكن اكتفيت بالتخلص نهائي من الأصناف دي اللي بقصد تتسبب فأي ضرر وابتزاز بكل شر وطمع واستنزاف للإنسانية اللي ربنا خلقني بيها حتى لو كنت بأعاملهم بكل خير وماخدوش بالهم إن الطيبة اللي جواية طيبة من قوتي ورحمتي . وخاصة لما ألاقي اللي بيتعامل معايه ضعيف وناقص . ولكن لابد من مواجهتهم بكل ردع ولازم يتحطلهم حدود لأنى ما زلت بأواجه بقايا الناس دي ولكن إن شاء الله ح أكسب فالنهاية لأن اللي يخسرنى خسران ويستاهل مصيره اللي اختاره".

وتابع الشاعر الشهير: "لذلك قررت شطب واستئصال كل حد لا يليق ومرفوض.. واحتفظت فقط بالناس اللى قلوبهم ونيتهم سليمة فالفن والحياة . وشكرا على هذا الحب والاحترام اللي ح أفضل قده وأرد عليه بكل فن وأشكر كل قلب كتبلي أو بعتلي أو كلمني يطمن عليا واعتبرته شاركني ووقف معاية بكل حب فالتجربة دي".

وردا على ما تردد بأن إعلان قرار اعتزاله كان رغبة منه في تصدر التريند قال بهاء الدين محمد: "ومهم جدا أقول أنا مش بتاع ترندات ولا ظهور إعلامي بالعكس من سنين واخد قرار أعيش فحالي بعيدا عن الأضواء وأسيب أعمالي فقط ف دايرة الضوء ويكفيني إن كلماتي تعيش وتفضل ناجحة وفي قلوبكم.. شكرا من قلبى يا أغلى الناس".

رد فعل النجوم على اعتزال بهاء الدين محمد

وبعد إعلان قرار اعتزاله تفاعل نجوم الموسيقى والفن مع المنشور في تعليقات منها ما كتبه تامر حسين: "غير مقبول ومرفوض وفنك مش ملكك فقط كل الناس اللي بتحب كلامك الحلو وتاريخك المُشرف ماشبعناش منه ولا من إبداعك وصورك الحلوة  يا كبير شعراء مصر والوطن العربي بنحبك جميعاً سواء زُملاء أو معجبون مانستغناش عن شاعرنا الكبير فاسحب البوست ده وامسحه ده مطلب جماعي مش شخصي ربنا يروق بالك".

وبهاء الدين محمد واحد من أشهر الشعراء في الوطن العربي اللذين شاركوا في صناعة تاريخ نجوم الغناء بينهم عمرو دياب، إيهاب توفيق، أنغام، سميرة سعيد، محمد منير، هيثم شاكر، ونخبة من نجوم الغناء في الوطن العربي.