ردود أفعال متباينة بعد رسالة محمد صلاح: هذه تعليقات المشاهير

تباينت ردود أفعال المشاهير والنجوم على فيديو محمد صلاح أمس، والذي طالب فيه العالم بضرورة إدخال المساعدات لأهالي غزة معرباً عن أسفه لسقوط العديد من الضحايا، وما بين الهجوم والدفاع عنه جاءت ردود الأفعال.

هجوم على محمد صلاح

الفنان الشاب حازم إيهاب، انتقد تعبيرات محمد صلاح للتعبير عن تضامنه موضحاً أنه يحبه بالفعل مقارناً بينه وبين الإعلامي باسم يوسف، قائلاً: "باسم يوسف عمل إيه أو إيه الخطوة اللي عملها اللي خلى العالم كله يتكلم عنه.. حلقته جابت 8 أو 9 مليون، وأتكلم  بحماس وعبّر عن رأيه بحيادية تامة، يا محمد كنت تعبر كأي شخص بيفكر صاحب نفسه قضية، الناس بتتحمي فينا".

وأوضح حازم إيهاب أنه لم يكن لديه أزمة في عدم حديث محمد صلاح وتمسكه بهذا الأمر معلقاً: "معنديش أي مشكلة على الإطلاق في تقبلك لكل الانتقادات اللي بتتعرض ليها، وفاهم إنك تبرعت للهلال الأحمر لصالح الضحايا في غزة، وأنا مش ضد قبولك للنقد وأن عندك اللي تخاف عليه، ولكن معرفش إيه هو، ودي أكتر حاجة استفزتني كثير، مكنش عندي أزمة إنك تفضل مكمل في النظرية دي وتسيب الناس تضرب دماغها في الحيط".

مشاهير يؤيدون محمد صلاح

وعلى الجانب الآخر، رد بعض الفنانين على انتقادات بعض رواد مواقع التواصل الاجتماعي، من بينهم الفنانة لقاء الخميسي التي نشرت عبر حسابها الشخصي على موقع إنستغرام: "أنا عارفة إن دا مش التوقيت المناسب بس الصراحة أنا مش قادرة ماقولش الكلمتين دول، محمد صلاح خط أحمر، ماينفعش نحكم على الناس وندخل في قرارتهم ونطلب منهم يعملو اللي إحنا شايفينه صح".

وتابعت: "كل إنسان من حقه يختار موقفه ورد فعله بناء على تفاصيل تخصه، رجاء بلاش أحكام على الناس اللي كلنا عارفين قد إيه صلاح إنسان".

ومن جهتها طلبت الفنانة رانيا فريد شوفي التماس العذر لمحمد صلاح، معلقة: "لازم نلتمس الأعذار ومحمد صلاح ممكن يكون في عقده مع ليفربول ممنوع يتكلم في السياسة والدين لكن هو اتبرع".

وطالبت الجمهور بالتعامل مع الأمر بحكمة قائلة: "براحة على صلاح معندناش واحد تاني عالمي زيه ولازم نحافظ عليه"، مشددة على ضرورة دعم أهالي غزة: "لازم ندعم أهالي فلسطين ده أقل حاجة نقدر نعملها هو ممكن ميبقاش حاجة كبيرة فعلاً، ونتمنى أن يكون في ايدينا الأكتر ونقدر نعمله..والموضوع لازم يبقى إنسانى وتطرح القضايا والناس تشوف الظلم اللى هما بيعملوه".