نص اعترافات مذيعة الراديو رانيا صفوت بعد قتلها زوج شقيقتها: خلاف فلوس

مازالت التحقيقات جارية مع مقدمة البرامج بالراديو رانيا صفوت في واقعة اتهامها بقتل زوج شقيقتها بعد نشوب خلافات بينهما.

نص اعترافات رانيا صفوت

وجاء نص اعترافات المذيعة رانيا صفوت في التحقيقات كالتالي:"اللي حصل جوزي عبد الرحمن خليفة، كان مشارك واحد اسمه كريم من السيدة زينب في براند ملابس وكريم ده دفع 300 ألف جنيه، لكن موضوع مامشيش كان باقي لكريم ده فلوس من الشراكة حوالي 150 ألف جنيه لأن جوزي سدد له نص المبلغ، ودخلت كورونا قال لي مش هقدر أسددلك باقي المبلغ ده دلوقتي عشان أنت شايف الظروف هديك أرض في الفيوم لأني معيش سيولة، لكن كريم ده رفض ياخد الأرض، وقاله لا أنا عاوز فلوسي لكن طبعا عبد الرحمن جوزي مسددش فلوس لأني مكنش معاه فلوس من ساعتها مش بنزل السيدة، ومن وقتها بدأ كريم يدور علي جوزي".

وتابعت: "كريم ده خالته اسمها مها، كانت بتتعامل معايا على أساس تجيبلي شغالات وأخدت كريم وراحت عند أحمد جوز أختي مرام وطلبت منه إنه يقول مكان جوزي فين وامبارح كان أبويا وأمي تعبانين فروحت أنا وعبد الرحمن جوزي عشان نطمئن عليه، كان هناك أختي سعاد وجوزها وأختي التانية مرام وكنا عاوزين نجيب ليهم دكتور فجوزي اتصل بدكتور يعرفه وجه يكشف عليهم وبعد مكشف نزلت أنا وجوزي عشان نحاسبه وعشان نجيب أكل من محل شاورما من قدام البيت".

رانيا تعترف بقتل زوج اختها بعد ضربها

وأضافت: "وفجأة لقيت الست اللي اسمها مها دي معاها حوالي 4 رجالة زقوني وراحوا واخدين عبد الرحمن جوزي وركبوا توك توك واختفوا، ناس قالتلي ركبوا تاكسي اختفوا قالولي كده روحت طالعه فوق لقيت أحمد جوز أختي مرام كان قاعد علي كرسي قدام الباب فروحت ضربته في صدره وقولتله عملك أيه عشان تسلمه هو جاي وقف معانا وجبلنا دكتور ودفع ليهم فلوس راح شدني ودخلني جوا الأوضة وهدومى انقطعت حاول يضربني بكرسي كان جنبه، أنا كنت واقفه جنب سفرة عليها سكينة فاكهة فروحت وخداها ضربته بيها في رجله شمال هو نزف دم كتير، حالة انهيار جاتلي حاولت أكلم النجدة أكتر من مرة معرفتش أوصل لحد وهما كلموا الإسعاف ياخدوه وأنا كنت مش في الوعي لحد شرطة ما خدتني وجابوني على القسم".

واستطردت: كان يتواجد في البيت أختي مرام جوزها أحمد المتوفي وسعاد أختي وجوزها رمضان وأبويا وأمي، بس شاف الواقعة بابا وماما ومرام أختي وجوز اختي سعاد اسمه رمضان.

خلافات وتشابك بالإيدي ينتهي بقتل

وانتقلت النيابة العامة إلى مكان الحادث وتمت معاينة مسرح الجريمة، وبالفحص تبين أن المتهمة قتلت المجني عليه بعد أن استلت سكينًا من المطبخ بسبب خلافات نشبت بينهما تطورت إلى التشابك بالأيدي.

وأضافت التحقيقات والتحريات أن المتهمة اعترفت بارتكابها الواقعة بحجة أن المجني عليه قام بإبلاغ الشرطة عن زوجها بتهربه من أحكام قضائية من دفع الضرائب.

وكشفت التحريات أن المجني عليه تُوفي نتيجة تأثره بإحدى الطعنات في منطقة القلب وأن المتهمة لم تحاول الهروب وجلست بجانب جثة المجني عليه حتى حضر ضباط قسم شرطة السيدة زينب وتم القبض عليها.

وأضافت التحريات أن الواقعة بدأت بنقاش وتبادل للشتائم بين المجني عليه والمتهمة فأسرعت بإحضار سكين المطبخ وسددت عدة طعنات به إلى صدر زوج شقيقتها فسقط على الأرض جثة هامدة غارقًا في دمائه في وجود شقيقتها التي حاولت إسعاف زوجها بعد سقوطه على الأرض.

وكانت الأجهزة الأمنية قد تلقت بلاغًا بقتل زوج شقيقة مذيعة مشهورة وانتقلت الأجهزة الأمنية إلى مكان البلاغ وتم القبض على المتهمة والتحفظ على أداة الجريمة "سكين" وبمواجهتها اعترفت بارتكاب الحادث بحجة وجود خلافات مع زوجها بعد إبلاغ الأجهزة الأمنية عنه.

وتم تحرير محضر بالواقعة وتولت النيابة العامة التحقيق وأمرت بحبسها 4 أيام على ذمة التحقيقات.