إنجي عبد الله تكشف عن تطور جديد في إصابتها بالسرطان

  • تاريخ النشر: الخميس، 31 مارس 2016
إنجي عبد الله تكشف عن تطور جديد في إصابتها بالسرطان

كشفت ملكة جمال مصر السابقة الفنانة إنجي عبد الله عن تطور جديد في حالتها الصحية، بعد إعلان إصابتها بالسرطان في المخ.

وكتبت إنجي عبد الله تدوينة طويلة على حسابها الشخصي على موقع التواصل الاجتماعي فيسبوك، عبرت خلالها عن سعادتها بعد ما أجرت فحوصات وإشاعات جديدة في اليابان، حيث كتبت إنجي عبد الله:

"أنا الحمد لله كويسة ومبسوطة أوي علشان عرفت إن الورم الحمد لله مش خبيث، أنا عملت فحوصات كتير هنا في اليابان واللي اتأكدت منه دلوقتي أنو مش خبيث لأن حجم الورم متغيرش من شهرين، وفي احتمالات تانية كتير، إنه يكون فيروس أو إنفكشن، بس هعرف النتيجة النهائية كمان أسبوع، أنا دخلت المستشفى لمدة أسبوع عملت فحوصات كتير على المخ، وعينه من النخاع الشوكي، والله العظيم كل الدكاترة اللي متابعين حالتي هنا مذهولين، في الإشاعات باين حجم ورم وكبير في مكان خطر هو جزع المخ اللي ميقدروش يخدوا عينه منه لأنه في مكان خطر، بس أنا معنديش أي أعراض خارجية غير لما أمشي لمدة طويلة بفقد الإحساس برجلي وأحيانا بشوف كل حاجه قدامي اتنين، وهما مش عارفين إزاي ده ممكن يحصل، وفعلا شايفني حالة غريبة، لأن الأعراض اللي عندي حاجة بسيطة قدام الإشاعات اللي شايفنها، بس هقول الحمد لله إن الدعا اللي اتدعالي من كل الناس اللي حواليا أهلي وأصحابي مسلمين ومسحيين وحتى بوذين هنا من أصحابي في اليابان، والحب والخوف اللي شفته من الناس عليا وحتى جوزي اللي ربنا أكرمني بيه ووقف جمبي وكان بيراسل أكبر مستشفيات في لندن وأمريكا لحد الفجر هنا علشان فرق التوقيت بينا، حسيت أنا أد إيه محظوظة ومكنش فارق معايا إيه ممكن يحصلي كفاية إني شفت الحب ده من كل اللي حواليا، وساعتها كنت بفكر إنوا خلاص كلها شوية وقت مش أكتر، بس كنت سعيدة و عمري حتي ما عيطت مرة، قلت كلنا لينا وقت وأنا ممكن وقتي جه، بس كفاية إني كنت محظوظة وشفت حب الناس وأد إيه دي نعمة، بس الحمد لله إني كويسة وفي أمل كبير أوي دلوقتى إنها تطلع حاجة ممكن تتعالج، أنا فعلا بشكر كل اللي حواليا وحاسة إن كل الدعا اللي اتدعالي فرق كتير وعندي إيمان إن ممكن يكون غير من حاجة وحشة كانت هتحصلي، بجد شكراً من قلبي وربنا يحميكوا لأهلكو وكل الناس اللي بيحبوكوا وبتحبوهم .شكراً".

قد يعجبك أيضاً: