موقف محرج يجمع عادل إمام وأكرم حسني والأخير يحكي التفاصيل

حكى أكرم حسني عن موقف محرج بينه وبين الزعيم عادل إمام، متحدثا عن تأثير الزعيم على حياته وسر القانون الذي اعتمده الفنان الشاب في حياته بعد ذلك.

وقال أكرم حسني إن عادل إمام وضع له قانون اعتمده بعد ذلك في حياته المهنية، وهو احترام المواعيد، مؤكدا على أن تأثير الزعيم في حياته كبير.

موقف محرج لأكرم حسني مع عادل إمام

وعن كواليس الموقف المحرج قال أكرم حسني: "تمر 6 سنين وبعمل برنامج أبو حفيظة لقيت تليفون جالي رديت، لقيته الأستاذ عادل إمام، أنا كنت عيان وقتها خفيت .. قالي كلام حلو جدا وقالي أنا عايزك يوم كذا تجيلي المسرح تتفرج على المسرحية وشوف العدد اللي عايز يجي معاك، قلت له طبعا يا أستاذ يشرفني.. وبعد ما قفلت افتكرت ان أنا في اليوم ده كنت هطلع مع تامر أمين في البيت بيتك عالهوا واتكسفت أكلم أستاذ عادل وأقوله عندي حاجة".

واستكمل أكرم حسني كواليس الموقف المحرج قائلاً: "وتأخرت جدا والطريق كان زحمة ووصلت بعد الفصل الأول من المسرحية ما خلص .. خلصنا المسرحية ودوني أوضته وحسيت إني عامل زي اللي هيتحاسب، خايف وعايز أقوله إن اللي حصل ده بره إرادتي .. أول ما شافني قالي عيب لما عادل إمام يعزمك على مسرحه وتتأخر واللي عايز يبقى فنان كبير لازم يلتزم بمواعيده".

وتابع: "وده كان بالنسبالي أكثر موقف محرج تعرضت له في حياتي، لسه جاي أشرح له الأسباب قال لي مش عايز أسمع.. بس خرجت يومها من عنده واتعلمت إني لازم أركز في المواعيد وخدت منه فكرة أن الفنان التزام .. بقت بالنسبالي قانون.. من المواقف اللي سابت أثر عندي".