خطيبة عمرو سمير السابقة تنعيه بكلمات مؤثرة وتكشف 3 أشياء لم تتغير فيه

قامت إسراء طاهر خطيبة المذيع والفنان الراحل عمرو سمير بكتابة تدوينة طويلة على حسابها الشخصي على موقع التواصل الاجتماعي فيسبوك، نعته من خلالها ووجهت له رسالة بكلمات مؤثرة للغاية، بعد وفاته المفاجئة عن عمر يناهز 33 عاماً.

ونشرت إسراء صورة مجمعة لها مع عمرو سمير أثناء فترة الخطوبة، وكشفت خلال تدوينتها عن أشياء كثيرة تغيرت في عمرو ما عدا ثلاثة أشياء، وكتبت إسراء تدوينتها قائلة " فيه ناس كتير مكانتش بتستوعب أو بتبلع صداقتي أنا وعمرو لمجرد اقتناعهم إن ماينفعش اتنين كانوا مخطوبين يبقوا أصحاب بعد كده.. بس أنا بحمد ربنا إننا عرفنا نبقى كده وبحمد ربنا إننا في الشهرين اللي فاتوا كنا قريبين أكتر من أي فترة في صداقتنا، كانت صداقة ليها شكل خاص جدًا إحنا بس اللي فاهمينه".

وأضافت "رمضان اللي فات كنت بحكيله إني مش عارفة أقرا قرآن بشكل كافي بسبب التصوير، قعد تقريبًا رمضان كله يشجعني أني أقرا ويفكرني كل شوية، أو يصورلي صورة من الجزء اللي هو فيه ويبعتهالي عشان يغيظني ويحمسني ليلة 27 كلمني مكالمة طويلة أوي وهزرنا كتير واتفقنا على حاجات نعملها بعد العيد، بعدها بدأنا نتكلم عن ربنا وقعد يتكلم عن قد إيه بيحبه أوي وبيزعل لو زعله ونفسه دايمًا يعمل مجهود عشان يقرب منه، قعد يشجعني ويدعمني في حاجات ليها علاقة بكلامنا كان عارف إنها مضايقاني وفي أخر المكالمة قال لي أنا عارف إنك زعلانة عشان مش هتعرفي تصلي التهجد وإنتي في التصوير بس أنا هدعيلك وأنا بصليها، وإنتي برضه أقعدي ادعي وسبحي لحد الفجر وبعد الصلاة كلمني وقال لي دعيتلك كتير أوي".

شاهدي أيضاً: آخر صورة لعمرو سمير قبل وفاته بساعات

وتابعت "على قد ما قربنا أكتر مؤخرًا واجع قلبي دلوقتي، على قد ما هو باسطني عشان مرتاحة إن ماحدش فينا شايل ذرة ضيق من التاني في أي حاجة.. وعشان بحكم مكالماتنا ومسدجاتنا الكتير في رمضان عارفة إنه بإذن الله صامه وقامه إيمانًا واحتسابًا وتقريبًا مفوتش ولا فرصة عبادة وبإذن الله ربنا هيتقبله وده مخليني مطمنة شوية كمان عشان اتكلمنا في حاجات كتير أوي وشوفت قد إيه متغير في حاجات كتير لما كنا بنفتكرها دلوقتي كنا بنقعد نضحك عليها، وشوفت قد إيه بقى دايمًا حريص إنه مايجيبش سيرة أي مخلوق بطريقة وحشة ولا يحكم عليه".

وكشفت إسراء "حاجات كتير اتغيرت في عمرو إلا 3 حاجات، حبه لربنا، بره لأمه اللي تقريبًا عمري في حياتي ما شوفت زيها، وطيبة قلبه قلبي فعلًا واجعني، واجعني إن الناس تعزيني فيه، واجعني إني بدعيله النوع ده من الدعا، واجعني إن معجباته اللي كانوا يعرفوني زمان يكلموني بيعيطوا، واجعني إننا مستحيل نتكلم تاني وواجعني أوى على مامته هفتقدك أوي يا عمرو".

واختتمت تدونتها "هفتقد هزارنا وكلامنا وهفتقد جدًا جدًا علاقتنا المختلفة اللي بيتهيألي مستحيل يبقى عندي زيها تاني أبدًا، ربنا يصبر طنط ماجدة ويربط على قلبها وينور قبرك ويثبتك عند السؤال ويرزقك الجنة، يا رب تبقى مرتاح أكتر من أي وقت فات، أنت كنت دايمًا حسن الظن بربنا وهو هيبقى عند ظنك به".

وكان عمرو سمير قد قرر قضاء عطلته الصيفية في أسبانيا، بعد قضاء العيد مع أسرته ووالدته الإعلامية الكبيرة ماجدة عاصم، واحتفل عمرو بعيد ميلاده الـ33 قبل وفاته، حيث وافق عيد ميلاده يوم 3 يوليو الشهر الجاري، وتوفي في أسبانيا أثناء نومه، إثر تعرضه لأزمة قلبية.

يذكر أن عمرو سمير بدأ حياته كممثل في العاشرة من عمره، بدأ حياته الفنية في فيلم "القتل اللذيذ" أمام ميرفت أمين، ثم عاد إلى الساحة من خلال عمله كمقدم برامج، فشارك في تقديم البرنامج الشبابي "شبابيك"، وبعد فترة عمل في قناة otv وقام بتقديم برنامج بمفرده هو برنامج "إيه الأخبار".