عصام عمر بطل مسلسل بالطو يكشف أصعب المواقف التي أثرت فيه

استضافت الإعلامية منى الشاذلي الفنان عصام عمر بطل مسلسل بالطو في برنامجها معكم المذاع على فضائية سي بي سي، وروى للفنان عصام عمر قصة بدايته مع الفن وهجرته لأمريكا وكيف عانى في مشواره الفني.

عصام عمر يحكي أصعب لحظات حياته

وأضاف عصام عمر خلال البرنامج وقال «أي حد عايز يحقق حاجة لازم يتعب، فأنا تعبت عشان أوصل للحاجة اللي أنا عايزها».

وتابع عمر وقال: «اشتغلت وعملت كاستينج هنا، وبدأت أعمل إعلانات ثم توقفت عشان مبقاش محصور في مجال الإعلانات فقط، وقتها مكنش معايا فلوس، وقعدت فترة مش عارف أعيش كويس وأنا مبقدمش إعلانات لكن كنت بحاول أؤهل نفسي عشان أكون ممثل كويس».

وأردف: «سافرت أمريكا مع الفرقة المسرحية اللي كنت شغال معاها وفي عامي 2016، 2017، قدمت على فيزا لأمريكا بالصدفة وحصلت عليها ومكنش معايا فلوس تذكرة أمريكا».

وعن زيارته لأمريكا قال عمر: «ولظروفي الملخبطة في القاهرة، صديق لي دفع تذكرة أمريكا، وقعدت عند صديق لي في أمريكا، وملقتش شغل هناك، فكانت فترة صعبة خصوصًا أنني كنت في رمضان وكنت عايز أسدد ديوني، ومكنتش عايز أرجع القاهرة تاني لكن قلت لنفسي لو محققتش نفسي في مصر، مش هعرف أحقق نفسي في أمريكا، ورجعت مصر، وبدأت أحاول أدخل المجال الفني مرة أخرى».

عصام عمر يكشف كواليس مسلسل بالطو

وسبق أن ظهر عصام عمر في لقاء إذاعي مع الإعلامية فاطمة مصطفى في برنامجها "الراديو بيضحك" على راديو 90 90 وتحدث خلال اللقاء عن علاقته الجيدة مع مخرج العمل وقال: «إحنا كنا محظوظين بفريق العمل، في أعمال مفيش توافق بين البطل والمخرج، ومجبرين يشتغلوا مع بعض».

وتابع: «في أعمال شاركت فيها كنت بحس أن طاقة المكان مبطلعش شغل، فالحاجة اللي بتطلع بحب بتبقى أحسن، رئيس منصة البث التي تعرض المسلسل هو الذي اختارني منذ البداية وقلت له بلاش أنا واعتقدت أنني سأكون غير مناسب، وطلبت أن أرشح ممثلًا آخر ولكنه أصر على تواجدي».

وتحدث عصام عمر عن علاقته بالممثلين المشاركين في العمل معه وقال عنهم: "مفيش حاجة اسمها بطل، وأنا ممثل وبعد المسلسل الدور اللي هيجيلى حلو هعمله مش هقول أنا عملت بطولة ومش هعمل غير بطولة".