شيرين عبد الوهاب: أعاني الوسواس القهري ولسة بحب حسام حبيب

كشفت الفنانة شيرين عبد الوهاب تفاصيل جديدة عن أزمة انفصالها عن زوجها السابق حسام حبيب، مؤكدة أنها لم تلجأ إلى حلاقة شعرها نتيجة مرض نفسي.

شيرين تنفي معاناتها من مرض نفسي

وأوضحت شيرين في لقاء مسجل مع الإعلامي عمرو أديب أنها لا تعاني من المرض النفسي، لكنها تعاني من حالة عدم اتزان حالياً.

وحول سبب حلاقة شعرها، قالت شيرين عبد الوهاب: "لم يكن أمامى غير كده، أنا حاسة أن دماغى بتفرز أفكار طول الوقت ولو سبت دماغى هتاكلنى، وأنا عملت كده لأنى ما كنتش حلوة فى عينيه، عملت كده علشان هو ما يشوفنيش حلوة، والفرق بين حلاقة الشعر والطلاق يوم واحد، حلقت شعرى قبل يوم واحد من الطلاق ودى مش أول مرة أقص شعرى، فاكر لما قولت إنى طالعة علشان أضحك الناس وقالوا عليا إنى كنت بتريق على البلد، كنت مدبوحة ودبحونى أكتر وقتها".

وتابعت: "الإنسان الحساس بزيادة ممكن يؤذى نفسه علشان يعاقب نفسه وأنا كنت بعاقب نفسى، أنا غلطت فى اسمى ومكانتى وقدرى".

وشددت أنها تحتاج الأن إلى احتواء الجميع لها وليس المساعدة: "محتاجة الناس ما يقولوش عنى كلمة تجرحنى مش عاوزة حاجة من حد".

ولفتت إلى أنها تتابع مع طبيب نفسي: "أنا مش مريضة نفسيا لكن جالى وسواس قهرى لما خلفت بناتى، ويمكن أكون قولت ده قبل كده ومتخيلة انى ممكن عيالى يتأذوا من أقرب الناس ليا، والمشكلة الصغيرة ممكن يكبرها مخى ويخليها قد الهرم، والمشكلة اللى قد الهرم ممكن يخليها صغيرة، ولو مريضة نفسيا هقول بنفسى لكنى مش مريضة نفسيا بشهادة دكتورى، انا ست حرة ولو فى حاجة انا اقولها قبل ما حد يقولها، علشان كده كنت بتريق على نفسى فى الحفلة قبل ما حد يتريق عليا".

شيرين تعلق على أزمة طلاقها

وحول قصة زواجها من حسام حبيب والطلاق بعد 4 سنوات، أوضحت أنها كانت رافضة للأمر في البداية، معلقة: "أنا قبل ما ابتدى الموضوع ده قولت لأ هو يكبرنى بسنة واحدة، وعلى فكرة انا لسه بحبه، أنا عمرى ما شفت واحدة بتطلق والناس بتباركلها كده كأنى راجعة من الحجاز".

وأكملت، "كان لازم يكون فى فرق بينى وبينه علشان يبقى فى شوية عقل علشان كده بنتى لما جت تلوم عليا فى يوم من الأيام قولتلها حبيبتى أنا بتربى معاكم وحسام بيتربى معانا والدنيا تستاهل نجرب ونحاول والأمومة دى حاجة كبيرة ومش هسيب لعيالى فلوس هسيبلهم حب".

وقالت: "أمى أول واحدة عرفت قرارى بالطلاق وأصرت عليه وحسام لما راح يتقدملى أول مرة أمى قالتله أجرى أجرى احنا هنعيل وهى كانت عندها حق".

وأكدت أن والدتها من البداية لم تكن موافقة على زواجها من حسام حبيب، معلقة: "هى من الأول كانت شايفة اننا ما ينفعش لبعض وإننا لازم نفضل صحاب، وعاوزة أقوله انت إنسان كويس جدا ومحتاج تشتغل على نفسك أنت معدنك كويس جدا ومتربى وعنده حاجات حلوة كتير والراجل لازم يفضل راجل وعندك حاجات حلوة كتير هو كمان كان ظالم نفسه كان بينزل ألبوم كل 8 أو 9 سنين فحرام الظلم ده ربنا م بيدى فرص كتير للناس".

شيرين عبد الوهاب تكشف محاولتها الانتحار

وخلال لقاء مع الإعلامية نضال الأحمدية، قالت شيرين عبد الوهاب إنها حاولت إنهاء حياتها بسبب ما مرت به خلال الفترة الماضية معلقة: "أنا عملت كل حاجة ممكن تخليني أموت".

ويبدو أن الحوار الصوتي الذي أجرته نضال الأحمدية مع شيرين عبد الوهاب كان قبل ان تظهر حليقة الرأس في حفل الإمارات خاصة بعد أن وجهت لها سؤالاً قائلة: "هتطلعي على الجمهور في حفل الامارات زي ما أنا بشوفك".

وردت شيرين عبد الوهاب قائلة: "دي مقدرة ولو قدرت أطلع للجمهور كدا في أي وقت أعرفي أني خفيت ".

ووجهت لها نضال الأحمدية سؤالاً قائلة: "لم تنتحري إيماناً"، إلا أن الرد جاء غير متوقعاً: "مين قالك إني مجربتش، ربنا ساترها معايا لحد دلوقتي لكن أنا عملت كل حاجة تخليني أموت متسألنيش أزاي والله العظيم ربنا لسة مش عايزني دلوقتي".

وتساءلت نضال الأحمدية قائلة: "حسام هيفهم اللي بتقوليه؟"، وردت شيرين عبد الوهاب: "انتي بتجمعي معاناتي كلها في شخص واحد، انتي قلبك لسة على الشخص ده، أنا قلبي على الأم اللي عايزة تربي بناتها اللي عايزة تفضل مع الناس اللي بتحبها وكفاية ذل، ده أنا ذليت الجمهور ولو كنت معبودة الجماهير ميحقليش أعمل كده".

وأوضحت أنها الآن تحاول أن تتعافى نفسيا من الآثار السلبية خلال فترة زواجها بحسام حبيب.