محمد فؤاد يوضح حقيقة خلافه مع هنيدي: عمره ما كان صاحبي

كشف الفنان محمد فؤاد، حقيقة خلافه مع الفنان محمد هنيدي بعد التصريحات المتبادلة بينهما على مدار الفترة الماضية، وكذلك حقيقة رفضه حضور حفل زفافه وسبب ابتعاده عن اللقاءات التلفزيونية لسنوات طويلة، مشيداً بالإعلامية ياسمين عز.

حقيقة خلاف هنيدي ومحمد فؤاد

وأوضح محمد فؤاد في لقاء له ببرنامج كلام الناس مع الإعلامية ياسمين عز، أنه بعد الانتهاء من عرض فيلم إسماعيلية رايح جاي الذي عرض عام 1997 لم تتكون صداقة بينه وبين هنيدي ولم يكن بينهما أي خلاف.

وتابع قائلاً: "عمرنا ما اتكلمنا مع بعض على فكرة دي معلومة لازم الناس تعرفها.. هنيدي كان يشرفني أنه يكون صاحبي، لكن هنيدي شلته غيري خالص وأجواؤه غيري، ولم يسبق أن نلتقي في أي مكان، لم نتفاعل إلا في الفيلم، وكانت القصة تقول إننا كنا أصدقاء، ولكننا ننشر المعاني الطيبة بين الأجيال والشباب".

وأضاف: "وهنيدي محصلش بعيداً عن فيلم إسماعيلية رايح جاي إني روحت له مكان أو هو جالي، ليه نبقى أنا وهو أصدقاء، أنا مش هكون صاحبه بالعافية أو غصب عنه".

وعن الأنباء التي ترددت عن رفض محمد فؤاد حضور حفل زفاف هنيدي، نفى الأمر مؤكداً أنه لم يتلق عزومة للحفل، قائلاً: "محصلش الكلام اللي بيتقال أنه عزمني على فرحه ومجتش وهو معزمنيش .. وبقول والله ما حصل وأنا مش هبقى صاحبه غصب عنه يعني".

وأوضح أن محمد هنيدي كان يريد أن يضع اسمه على التتر خلفه لكنه رفض لوجود بطلة في العمل، ولفت إلى أنه كان يتوقع فشل الفيلم لكن هذا لم يحدث.

وقال محمد فؤاد: "كنت بصحيه من النوم عشان يجي التصوير، وكان يمشي يقول إن فيلم إسماعيلية رايح جاي هيفشل ودا محصلش الحمدلله وحقق نجاح كبير، وأنا اللي صممت بوستر الفيلم بإيدي وحطيته قبل مني، يجي هو ويطلع يقول كلام ملوش لازمة في البرامج، ويشرفني أنه يكون صحبي ولكن مش بالعافية، وعمرنا ما كنا أصحاب".

محمد فؤاد يكشف سبب رفضه الظهور

وأوضح محمد فؤاد أنه رفض الظهور إعلامياً لسنوات طويلة بسبب تصيد الأخطاء في البراج التلفزيونة، قائلاً: "الناس دلوقتي تحسي إنهم بيبقوا قاصدين يخبوا الكويس ويظهروا الوحش بس".

وواصل حديثه: "وإن كان في شيء إيجابي ميتقالش ونطلع السلبي لأنه اللي بيجيب مشاهدات أو تريند أو بيلفت النظر وده في حد ذاته دينياً حرام وأخلاقياً ليه مسمى مينفعش نقوله على الهواء، إنما ده اللي مودينا في المصايب اللي إحنا فيها".

وأضاف: "ومحمد فؤاد من الناس اللي بينالهم من الحب جانب وقلت يا جماعة مش هغني غير لما اتطمن أن البلد بقت كويسة ومش هغني بالعافية مش هغني وأنا مش مبسوط".

محمد فؤاد يشيد بياسمين عز

وحرص محمد فؤاد على توجيه رسالة إلى السيدات بعدم كشف أسرار بيوتهم قائلاً: "إوعي تحكي حاجة بينك وبين جوزك لأبوكي، أو لأهلك، المشاكل بتبدأ لما السر اللي بينكم ويخرج، وجوزك ما بيسامحش فيها أبداً، فلازم تمسكي نفسك وتحتفظي بالسر، هو نفسه يقدر أنك حافظتي عليه، لأنه دايماً بيكون عايز شكله كويس قدام أهلك".

وأشاد بياسمين عز، مشيراً إلى سبب عدم رغبته في الظهور معها، قائلاً: "رافعة رأسنا أنتي على طول، وأنتي نجمة كبيرة وعاملة حالة ولازم تلاقي طوب كتير بس ربنا معاكي، مفيش حد ينجح من الهواء، وماردتش أطلع معاكي قبل كده عشان كنت تخين أوي الحمد لله إنها محصلتش".

وأشار إلى أنه حاول التخلص من وزنه بشدة: "عملت مرتين شفط دهون بهدلوني وكنت بخس واتخن وبقول للناس نصحية أوعوا حداً يعمل شفط دهون، أفضل حاجة عملتها تكميم المعدة برغم من أنني سمعت عنها كلام وحش لكن ربنا سترها معايا، كان لازم أعمل العملية لأني كنت هتعب وشغلي باظ وكنت هدخل في مشاكل صحية وصحابي هما اللي حجزولي عند الدكتور".