محمد رمضان يواجه أزمة بسبب انفجار قنبلة في شاب خلال تصوير إعلانه

يواجه الفنان محمد رمضان اتهاماً بالتسبب في إصابة شخص بإصابات بالغة في موقع تصوير إعلانه الجديد بعد أن تعرض لإنفجار قنبلة ضمن التصوير وهاجمت والدة المصاب الممثلة لبني ونس، محمد رمضان لإصابة نجلها بحروق في ظهره ومواقع حساسة.

ممثلة تهاجم محمد رمضان لإصابة ابنها

وكشفت لبني يونس على حسابها الشخصي على حسابها الشخصي بموقع التواصل الاجتماعي فيس بوك قائلة :" فى مهنتنا يا أستاذ محمد رمضان وأنت وأنا وكلنا عارفين إن ما يسمى بالنجم استغفر الله العظيم بيتعاملوا معاه فى اللوكيشن كأنه إله هو المِحور والكل يدور حوله، هل ممكن تتعرض لما حدث لابني فى التصوير معاك، مستحيل طبعا بتعمل أكشن وبتبقى عارف قبلها كل تفاصيله مرة واتنين وعشرة واللى عاجبك بتوافق عليه واللى مش عاجبك بتغيره".

وتابعت :"يعنى القنبلة اللى زرعها عصام الوريث لابني تحت منه ومن غير ما يقوله ولا حتى يلبسوا واقي يقدر يعمل معاك كدة ليه؟، انت بني آدم وابني مش بني آدم أنت أغلى الناس عند والدتك ويوسف نن عيني ومافيش أغلى من الضنا حط ابنك مكان يوسف هاتقول برضه كله فى حبكم يهون بس أرجع واقولك ابني ربنا هايجبله حقه من اللى اسمه عصام الوريث دة اللى ميعرفش أبجديات عمله اللى بيستبيح حياه الشباب عشان يحقق الطبيعية المزعومة الغلط اللى حضرتك بتتكلم عنها".

وختمت منشورها: "حق بني إن شاءالله هايرجعله مش هاسيبه عشان يبطل سي الوريث دة أنه يستهين بحياه الناس، سؤال بقى لما نموت سيادة النجم هايندفن فين ؟ الديان والعدل والحق موجود وأعتمدنا عليك يارب".

وواصلت شقيقة المصاب مهاجمة الفنان محمد رمضان موضحة أن شقيقها نجا من الموت أثناء تصوير إعلان لعبة يقوم ببطولته محمد رمضان بعد انفجار قنبلة فيه، موجهة حديثها إلى محمد رمضان قائلة: " اخويا يوسف ربنا نجاه من الموت امبارح، في تصوير اعلان لعبة اسمها free fire لمحمد رمضان، انفجرت فيه قنبلة فيها بارود، وخبير المفرقعات ال بيشتغل مع رمضان اسمه عصام الوريث المفروض جزء من وظيفته الحفاظ علي حياة الناس البيشتغل معاهم، قاله ديه قنبلة صوت ومطلعتش كدة، ومفكرش حتي يلبسه حاجة تحميه او ينبهه او يعدل مكان وقفته، ومنغير سابق انذار ومنغير اي احتياطات تحافظ علي جسمه وعلي حياته هو و ال حواليه انفجرت القنبلة تحت رجله".

ولفتت إلى أن شقيقها أصيب بحروق من الدرجة الأولي في ساقيه والتهابات وأن المسئول عن الخدع والمفرقعات في الإعلان يرى شقيقها يحمل الأمر أكبر من اللازم قائلة :"استاذ عصام كان شايف ان يوسف مأفور وان فيه ايه يعني ال حصل دة انت مثلت مع رمضان دة انت دخلت التاريخ وشوفت المشهد طلع حلو ازاي!".

وختمت حديثها بتوجيه الشكر لأشرف زكي، نقيب الممثلين موضحة :"استاذ اشرف زكي مشكورا ماسبهوش لحظة ومتابع معانا كل التفاصيل، فيه تقرير طبي وفيه محضر وهتبقي قضية وكدة كدة حقه مش هنسيبه، والبوست هيفضل مفتوح للتعديل وعشان نزود كل تفصيله في القصة دي الي عنوانها الإهمال والا مبالاه والفشل، والناس ال فاكرة انها ممكن تعمل اي حاجة وتعدي بيها عادي".

محمد رمضان يكشف إصابته بحرق

وكشف محمد رمضان عن تعرضه لحرق في ظهره أثناء تصوير مسلسل موسى إذ نشر عبر حسابه الرسمي بموقع وتطبيق "انستجرام"  من كواليس تصوير المسلسل.

إذ أوضح محمد رمضان أنه تعرض للإصابة بحرق في ظهره، وكان يتلقى الإسعافات الأولية.

وعلق رمضان على الفيديو كاتباً: "الحمد لله وقدر الله وما شاء فعل إصابتي كانت شديدة أثناء تصوير انهاردة ولكن الحمد لله الأهم أن الشغل يوصلكم حقيقي وكله في حبكم يهون".