تامر حسني يحكي تجربته الروحانية ويوجه رسالة لمتابعيه

شارك الفنان تامر حسني أفكاره الروحانية عن الصلاة مع متابعيه، مستشهداً بمواقف إنسانية حدثت معه بالفعل، حيث أكد أن غير المنتظمين في الصلاة ليسوا بمنافقين كما يدعي البعض، ولكنهم مجاهدون في سبيل الله، يجاهدون أهواءهم حباً وطمعاً فيه.

قطع ووصل

أكد تامر حسني في منشور طويل شاركه عبر حساباته على مواقع التواصل الاجتماعي، أنه قطع ووصل الصلاة كثيراً حتى تمكن من الانتظام في الصلاة، مشيراً إلى أن هذا التقطع يمنح الشخص ثواباً أكبر عند الله.

وقال تامر حسني: "أنت مش منافق أنت مجاهد، في أكيد فيكم مش بيصلي أو بيقطع في الصلاة  اللي بيقطع في الصلاة  عايز أقول … أفضل قاوم شيطانك لحد ما تنتصر. ده حصل معايا شخصياً  أواظب واقطع ميت مرة لحد ما استقريت مهما أخد وقت ثوابك هيكون أكبر لأنك بتجاهد نفسك وشيطانك عشان خاطر ربنا".

تابع: "وفي نوع تاني اللي بيقول ((هبدأ من بكرة)) ويقدر ويقول معلش بكرة وميقدرش تالت وميقدرش عاشر أحب أقوله حتى لو عزمت النية ١٠٠٠ مره و مش بتنفذ .. ربنا بيفضل مستنيك بمنتهى الحب لأنه شايف مجهود نيتك في الإصرار على الرغبة حتى لو مش قادر تنفذ هيجازيك خير برضو على رغبتك حتى لو منفذتش لسه و هيبقى مستنيك تاخد القرار وفاتح لك أيده بكل حب عشان تنطلق وتدخل في رحمته وفي معيته".

الناس نوعان

أكد تامر حسني أن الناس نوعان منهم من يشجعك ومنهم من يجذبك للخلف وتابع موضحاً: "في الوقت ده بيبقى حواليك ناس يا بيشجعوك ودول ناس تمسك فيهم يا ناس مش بتصلي ياريت تبعد عنهم هما مش عايزينك تصلي غيره منك لأنهم من جواهم مقتنعين بربنا بس بيكابروا فبيزعلوا عشان متبقاش أعلى منهم عند ربنا حتى لو في شيء من الذنوب بتعملها عادي كلنا خطائين أوعى تخليهم يقولوا لك يا عم أنت بتعمل ذنب كذا وكذا ازاي تصلي يا منافق".

أضاف: "لا. وألف لا أنت مش منافق أنت مجاهد لنفسك ولشيطانك يعني في تحدي أكبر ثوابه أكبر بكتير عشان بقى خاطر ربنا غالي عندك و بتعمل اللي هو عايزة أنك تصلي وكل ما تغلط تروحله هو بيحب كده و هيسامحك عادي ،، ولو غلط وروحت له ١٠٠٠ مرة المهم ان كل مرة يبقى عندك نية الارتقاء بنفسك معاه وتتصدق كتير صدقوني في قوة خارقة في تأثير الصدقة وفي كل ذنب عليكم بالناس البسطاء فرحوهم أوي . ربنا هيفرحك أوى انا مش شيخ يا جماعة مش بتكلم كفنان لا انا بتكلم كإنسان".

كثير القراءات

أشار تامر حسني إلى أنه كثير القراءات ومحب للمشاركة وقال: "انا بقالي سنين يمكن من أكثر الناس اللي بتقرا في العالم في كل الاتجاهات انا فعلاً بصحى من النوم بثقف نفسي وكل حرف بعرفه وكل معنى جميل أعرفه بحب أوصله ليكم دي إنسانيات عشان احنا كبشر أخوات لازم نقوي بعض".

معاملة الله VS معاملة البشر

استكمل تامر حسني حديثه الطويل قائلاً: "الناس لازم تفرق بين معاملة البشر للبشر ومعاملة ربنا للبشر، يعني البشر لو مسألتش فيه يومين هو مش هيسأل فيك 10 و هيردهالك بس ربنا مش كده اوعوا تشوفوا ربنا بيعاملنا كده .. ربنا يعني الرحمة كلها بالعكس بيفضل يناديلك كل يوم 5 مرات ولسنوات وانت مش بترد و بيقولك انا أكبر من اللي بتعمله تعالى أصلح لك روحك وأشوف احتياجاتك واشفيك وأريح قلبك وأنت بتهمله ومش مرة لا سنين كتير".

وأردف تامر حسني متحدثاً عن كرم الله: "وكل يوم 5 مرات ينادي بعظمته وجلاله وأنت برضو مش بترد ونسمعه بيقول في الأذان الله أكبر يعني يا فلان مهما كنت بتعمل ايه ، انا أكبر وأهم ..تعالى خد مصلحتك واعمل لروحك صيانة و مش ببلاش لا ده ربنا ساعتها بيكتبلك ملايين النجاحات والأموال والرحمات وإسقاط الذنوب ويفديك ويشفيك وينور بصيرتك كفاية اسمك هيبقى مع الناس اللي مكرمهم تحت معيته وحمايته".

إصرار على ترك الصلاة

أكمل تامر حسني قائلاً إن البعض لا يزال يصر على ترك الصلاة: "وأنت برضو مش بتروح و مش مقدر النعمة دي جرب تفهم وتحس إن لما نسمع أذان بيقول الله أكبر جرب أنك تفهم المعنى ان الله أكبر من اللي بتعمله دلوقتي حالاً وإن ربنا مستنيك تطلب منه عشان يرضيك ويشيل ذنوبك ومهما كنت بتغلط وترجع تصلي عادي دا أصلا لازم عشان تمسح الذنب اللي فات".

تابع: "الصلاة والصدقة بيمحوا السيئة والصدقة بتطفئ غضب الرب يعني هتنضف وتمسح في مشوارك مع ربنا غلطه وكمان هيبدلهم ليك حسنات في أحلى من كده بالذمة !!!؟؟؟أوعوا تحسوا ان عشان في ناس في الزمن ده اتغيروا وبقوا بعيد أوي عن فكرة ربنا أصلا وممكن يتريقوا عليك لو صليت أو صومت .. ده الموضوع ده يخليك لازم تصلي أكتر من الأول عشان ثوابك بقى أكبر بكتير".

استرسل تامر: "لأنك تحولت من مجاهد لنفسك لمدافع عن ربنا بتدافع عنه بقوة قدام ناس دانت كده كمان بقيت جندي من جنوده بتحارب عشانه ويا بخت اللي ربنا بيستخدمه وكمان لو ربنا هداهم بسببك شوف بقى هتقش حسنات قد ايه يابن المحظوظة هو دا صراع الدنيا هنآمن بربنا من غير ما نشوفه و هنعمل بالكنز اللي في القرآن".

المصحف جنة

وعن وجود المصاحف في المنازل قال تامر حسني: "أقسم بالله أقسم بالله أقسم بالله اللي عنده مصحف في بيته هو عنده الجنة و مش فاهمها عنده دليل واضح جواه أغلى من الكنز خصص في اللايف ستايل عندك مهما كنت بتغلط عادي ربنا تواب وأفضل قلل من ذنوبك أفضل قللها واحدة واحدة ده اسمه جهاد مع النفس يعني شيء عظيم ربنا شاهد على مجهودك فيه حتى لو روحت وجيت وروحت وجيت كل دي محاولات ربنا يحبك أكتر عشانها وتكسب في الآخر ان شاء الله".

اختتم تامر حسني كلامه وقال: "ربنا وصلاته والصدقة وبر الوالدين، وشغلك، وأصحابك، اهتم بكل دول اليوم طويل 24 ساعة عيشهم صح يا صاحبي عادي والله في وقت ونص لكل دول".

ولاقى منشور تامر حسني تفاعلاً كبيراً بين متابعيه، وطالبه البعض بتسجيل القرآن بصوته، فيما أشاد آخرون بكلامه الإيجابي الموجه لمتابعيه الذين قطعاً سيقتنع منهم كثير بهذه النصائح.